Акафист преподобной Елисавете Константинопольской, чудотворице


 
Текст утвержден Священным Синодом 
Русской Православной Церкви 
16 апреля 2016 года
(журнал № 16)
 
 

Ака́фист преподо́бней Елисаве́те Константинопо́льстей, чудотво́рице

Конда́к 1

Избра́нней от преве́чнаго Бо́га чудотво́рице преди́вней/ тебе́, преподо́бная ма́ти Елисаве́то,/ похва́льное прино́сим пе́ние./ Ты же, я́ко иму́щая ве́лие дерзнове́ние ко Го́споду,/ от вся́ких нас бед и боле́зней свободи́/ и к доброде́тели наста́ви, да зове́м ти:// Ра́дуйся, преподо́бная ма́ти Елисаве́то, чудотво́рице, Бо́гом избра́нная.

И́кос 1

А́нгелов Творе́ц и всея́ тва́ри Соде́тель призва́ тя, всечестна́я, пре́жде рождества́ твоего́ (от чре́ва ма́терня) послужи́ти Ему́ в преподо́бии и пра́вде, те́мже и мно́гими да́ры небе́сными украси́ тя. Сего́ ра́ди и мы, сла́вяще равноа́нгельное житие́ твое́, со благогове́нием воспева́ем ти сицева́я:

Ра́дуйся, пречестно́е селе́ние Святы́я Тро́ицы;

ра́дуйся, А́нгелом благогове́йная собесе́днице.

Ра́дуйся, сокро́вищнице даро́в Ду́ха Свята́го;

ра́дуйся, благоуха́нная ве́тве ра́йская.

Ра́дуйся, всем се́рдцем Христа́ возлюби́вшая;

ра́дуйся, сораспя́тися Спаси́телю возжела́вшая.

Ра́дуйся, мно́гими чудесы́ Творца́ просла́вившая;

ра́дуйся, наде́ждо и по́моще всем с ве́рою тя призыва́ющим.

Ра́дуйся, преподо́бная ма́ти Елисаве́то, чудотво́рице, Бо́гом избра́нная.

Конда́к 2

Ви́дя многоми́лостивый Госпо́дь богоуго́дное житие́ роди́телей твои́х, Елисаве́то всечестна́я, по мно́зех ле́тех безча́дия посла́ святу́ю му́ченицу Свою́ Глике́рию благовести́ти им ра́дость ве́лию о гряду́щем рожде́нии твое́м. Мы же, дивя́щеся пресла́вному виде́нию сему́, Творца́ и Промысли́теля вся́ческих славосло́вим, вопию́ще Ему́: Аллилу́ия.

И́кос 2

Ра́зумом боже́ственным и благода́тию еще́ во чре́ве ма́тере твоея́ просвеще́нная, всесла́вная Елисаве́то, изде́тска яви́ла еси́ о́браз жития́ доброде́тельнаго, чте́нию же Писа́ния Свяще́ннаго и жития́ святы́х уго́дников Бо́жиих, па́че же к моли́тве усе́рдно прилежа́ла еси́. Мы же, сему́ подража́ти ревну́юще, со умиле́нием воспева́ем ти такова́я:

Ра́дуйся, ро́да честна́го отра́сле добропло́дная;

ра́дуйся, от непло́дныя ста́рицы, я́ко и Предте́ча, прозя́бшая.

Ра́дуйся, и́менем ма́тере велича́йшаго проро́ка нарече́нная;

ра́дуйся, уподо́битися пра́ведной Елисаве́те во свя́тости предызбра́нная.

Ра́дуйся, от младе́нства се́рдце твое́ Го́сподеви преда́вшая;

ра́дуйся, измла́да води́тельству Ду́ха Свята́го прилежа́вшая.

Ра́дуйся, я́ко от ю́ности ра́зум твой просвети́ся вы́сшею прему́дростию;

ра́дуйся, чистото́ю душе́вною, я́ко богосве́тлая свеща́, возсия́вшая.

Ра́дуйся, преподо́бная ма́ти Елисаве́то, чудотво́рице, Бо́гом избра́нная.

Конда́к 3

Си́ла Христо́ва осени́ тя, богому́драя Елисаве́то, и дарова́ ти кре́пость претерпе́ти искуше́ния врага́ неви́димаго, его́же стре́лы разжже́нныя сле́зными к Бо́гу моли́твами угаси́ла еси́ и ко и́ноческому по́двигу му́жественно устреми́лася еси́, жесто́кое житие́ иму́щи: боле́зньми по́стническими плоть укроща́ющи, ду́хом же укрепля́ема, Бо́гови при́сно пою́щи: Аллилу́ия.

И́кос 3

Иму́щи в се́рдце твое́м еди́наго Бо́га, всечестна́я Елисаве́то, по кончи́не роди́телей твои́х все име́ние ни́щим раздала́ еси́, и град твой Ира́клию оста́вивши, в царегра́дскую оби́тель пришла́ еси́, иде́же, красо́ты ми́ра сего́ отве́ргши, во о́браз а́нгельский облекла́ся еси́. Мы же, любо́вь твою́ ко Го́споду воспева́юще, велича́ем тя си́це:

Ра́дуйся, па́че земны́х небе́сная возлюби́вшая;

ра́дуйся, на Го́спода все упова́ние возложи́вшая.

Ра́дуйся, бога́тство и сла́ву ми́ра сего́ ни во что́же вмени́вшая;

ра́дуйся, сокро́вищу нетле́нному всем се́рдцем прилежа́вшая.

Ра́дуйся, цве́те де́вства и чистоты́;

ра́дуйся, плоть ду́хови покори́вшая.

Ра́дуйся, я́ко ра́дость послуша́ния пре́жде собла́знов ми́ра сего́ позна́ла еси́;

ра́дуйся, я́ко, и́ноческим путе́м ше́ствующи, небе́сных оби́телей дости́гла еси́.

Ра́дуйся, преподо́бная ма́ти Елисаве́то, чудотво́рице, Бо́гом избра́нная.

Конда́к 4

Бу́рю вражде́бных по́мыслов и мирски́х пристра́стий по́стнически усмири́ла еси́, ма́ти Елисаве́то пресла́вная, в зи́мнюю сту́жу горе́нием боже́ственныя любве́ согрева́ющися, те́ло слеза́ми псало́мски омыва́ющи, ду́шу богоподо́бну соде́лала еси́, непреста́нно Христа́ сла́вящи: Аллилу́ия.

И́кос 4

Слы́шавши глаго́лы ева́нгельския о мы́тари, не дерза́вшем взира́ти на не́бо, ты, о блаже́нная ма́ти, сему́ в покая́нии подража́ющи, три ле́та о́чи к высоте́ не возводи́ла еси́, до́лу главу́ прикло́ньши, серде́чныма же очи́ма небе́сною ле́потою у́мно наслажда́ющися. Те́мже многотру́дное твое́ сла́вяще житие́, воспева́ем ти та́ко:

Ра́дуйся, во еди́ном хито́не сту́жу и зно́й терпе́вшая;

ра́дуйся, безстра́стием в ри́зу нетле́нну, свы́ше истка́нную, обле́кшаяся.

Ра́дуйся, соверше́нную четыредеся́тницу пости́вшаяся;

ра́дуйся, не бра́шны, но Хле́бом Небе́сным насыща́вшаяся.

Ра́дуйся, в воздержа́нии велича́йшему из рожде́нных жена́ми подража́вшая;

ра́дуйся, го́рлице пустыннолю́бная, в Царегра́де я́ко в пусты́ни обита́вшая.

Ра́дуйся, се́мя про́поведи вели́каго Предте́чи в се́рдце твое́м насади́вшая;

ра́дуйся, в покая́нии три ле́та о́чи до́лу низводя́щи, плоды́ стори́чныя прине́сшая.

Ра́дуйся, преподо́бная ма́ти Елисаве́то, чудотво́рице, Бо́гом избра́нная.

Конда́к 5

Всесве́тлая звезда́ Ца́рскому гра́ду яви́лася еси́, Елисаве́то всехва́льная, на высоту́ соверше́нства смире́нием вознесе́нная и терпе́нием к но́вым по́двигом приугото́ванная: да́ры боже́ственными па́че обогати́лася еси́, славосло́вящи непреста́нно Вседержи́теля Бо́га: Аллилу́ия.

И́кос 5

Ви́дев тя святи́тель Генна́дий доброде́телей испо́лнену и да́ром разсужде́ния духо́внаго благоукра́шену, по кончи́не игу́мении поста́ви тя, преподо́бная Елисаве́то, прее́мницу ея́. Ты же, трудолю́бно подвиза́ющися, богому́драя наста́вница яви́лася еси́ не то́кмо сестра́м оби́тели твоея́, но и жена́м мирски́м, науча́ющи от лжи, лука́вства и злосло́вия удаля́тися, сла́бость ума́ молча́нием восполня́ти, в любви́ христиа́нстей и по́двизех моли́твы возраста́ти. Те́мже мо́лим тя, ма́ти преблага́я, бу́ди и нам во бра́ни со страстьми́ помо́щница, да зове́м ти:

Ра́дуйся, в Царегра́де наста́вницею мона́шествующих утвержде́нная;

ра́дуйся, служе́ния сего́ во всем ми́ре да́же до днесь не оставля́ющая.

Ра́дуйся, чистото́ю нра́ва о́браз воздержа́ния показу́ющая;

ра́дуйся, укрепле́ние всех в терпе́нии подвиза́ющихся.

Ра́дуйся, я́ко сете́й злоязы́чия и лука́вства избега́ти науча́еши;

ра́дуйся, я́ко неразу́мных жен нелицеприя́тно облича́еши.

Ра́дуйся, я́ко праздносло́вия и лжи бе́гати повелева́еши;

ра́дуйся, чи́стый сосу́де безмо́лвия, трезве́ния и кро́тости.

Ра́дуйся, преподо́бная ма́ти Елисаве́то, чудотво́рице, Бо́гом избра́нная.

Конда́к 6

Пропове́дница немо́лчная суде́б Бо́жиих яви́лася еси́, Елисаве́то блаже́нная, возвести́ла бо еси́ гряду́щее на град Константи́нь запале́ние о́гненное. Сострада́нием же дви́жима, вку́пе с преподо́бным Дании́лом Сто́лпником Человеколю́бца Бо́га дерзнове́нно моли́ла еси́ о лю́дех, пострада́ти иму́щих. Егда́ же моли́твами ва́шими угасе́ огнь, благода́рственно вси возопи́ша Творцу́: Аллилу́ия.

И́кос 6

Возсия́ спаси́тельная луча́ гра́ду твоему́, всехва́льная, егда́ веле́нием свы́ше гряду́щее бе́дствие благове́рному царю́ Льву прорекла́ еси́. Те́мже мо́лим тя, о ма́ти милосе́рдная, не оста́ви и нас, гре́шных и немощны́х, во дни испыта́ний на́ших, отведи́ вся́кий гнев от наде́ющихся на тя и вопию́щих ти такова́я:

Ра́дуйся, избра́ннице Бо́жия, та́йны гряду́щаго ве́давшая;

ра́дуйся, гнев на ми́лость премени́ти Го́спода Бо́га умоли́вшая.

Ра́дуйся, еди́на от пра́ведник, и́хже ра́ди отврати́ Госпо́дь от гра́да сожже́ние;

ра́дуйся, от огня́ гее́нскаго ве́рных спасе́ние.

Ра́дуйся, заступле́ние твое́ и во стране́ Ру́сстей явля́ющая;

ра́дуйся, ра́ны и ожо́ги еле́ем от ико́ны твоея́ исцеля́ющая.

Ра́дуйся, к покая́нию и премене́нию злых обы́чаев нас призыва́ющая;

ра́дуйся, от па́губы и обнища́ния мно́гих спаса́ющая.

Ра́дуйся, преподо́бная ма́ти Елисаве́то, чудотво́рице, Бо́гом избра́нная.

Конда́к 7

Хотя́ яви́ти си́лу свою́, дарова́ тебе́ Вседержи́тель Госпо́дь Креста́ ору́жие непобеди́мое, и́мже зми́я дре́вняго, во о́бразе зри́мом я́вльшагося, победи́ла еси́. К твоему́ предста́тельству прибега́юще, ма́ти досточу́дная, мо́лим тя, помози́ и нам то́ю же си́лою побежда́ти неви́димыя враги́, песнь побе́дную воспева́юще: Аллилу́ия.

И́кос 7

Но́вую обре́тше тя избра́нницу Бо́жию, лю́дие Евдомо́нския ве́си со слеза́ми и упова́нием к тебе́ притеко́ша, моля́ще изба́вити их от драко́нта лю́таго, пожира́ющаго вся́каго мимоходя́щаго. Ты же, о пресла́вная вои́тельнице Христо́ва, честны́м кресто́м вооружи́вшися и к ло́гову зве́ря прише́дши, зна́мением кре́стным того́ умертви́ла еси́, пято́ю попра́вши главу́ его́. Лю́дие же, чу́до сие́ ви́девше, в ра́дости воспе́ша ти си́це:

Ра́дуйся, во свяще́нней оби́тели великому́ченика Гео́ргия подвиза́вшаяся;

ра́дуйся, си́лу его́ победоно́сную духо́вно восприи́мшая.

Ра́дуйся, зна́мением Креста́ си́лу вра́жию победи́вшая;

ра́дуйся, побе́ду на неви́димаго врага́ сим ору́жием получи́вшая.

Ра́дуйся, главу́ зми́я пято́ю попра́вшая;

ра́дуйся, реши́мости во бра́ни духо́вней нас науча́ющая.

Ра́дуйся, одержи́мых стра́хом защи́тнице;

ра́дуйся, от напа́стей и наше́ствия враго́в изба́вительнице.

Ра́дуйся, преподо́бная ма́ти Елисаве́то, чудотво́рице, Бо́гом избра́нная.

Конда́к 8

Стра́нная и пресла́вная соверша́ющи чудеса́, о всеблаже́нная ма́ти, теле́сныя исцеля́еши неду́ги, па́че же науча́еши пре́жде о души́ пещи́ся, я́ко душа́ бо́льши есть те́ла: та́ко и неду́зи пло́ти уклоне́нием от грехо́вных на́выков во здра́вие претворя́ются. Сего́ ра́ди, богому́драя, роди́телю кровоточи́выя отрокови́цы, цено́ю всего́ име́ния жа́ждущему здра́вие дще́ри свое́й купи́ти, запове́дала еси́ пре́жде смиренному́дрие и нищелю́бие стяжа́ти, си́ми бо доброде́тельми благоугожда́ется Бог, да́руяй здра́вие и ве́лию ми́лость тружда́ющимся и с ве́рою вопию́щим Ему́: Аллилу́ия.

И́кос 8

Вся чудеса́ твоя́ зря́ще, преподо́бная, жены́ непло́дныя и кровоточи́выя нача́ша притека́ти во оби́тель твою́, и я́ко ева́нгельская жена́, кра́ю ри́зы Госпо́дни косну́вшаяся, исцели́ся, та́ко и сия́, пома́занныя тобо́ю святы́м еле́ом, а́бие исцеля́хуся, ве́лиим гла́сом воспева́юще ти такова́я:

Ра́дуйся, рождество́м свои́м непло́дство роди́телей разреши́вшая;

ра́дуйся, непло́дным пре́жде жена́м весе́лие о ча́дех да́рующая.

Ра́дуйся, любве́ ра́ди ко Христу́ де́вство избра́вшая;

ра́дуйся, жен неду́жных си́лою моли́тв твои́х исцеля́ющая.

Ра́дуйся, за́поведи ева́нгельския исполня́ти повелева́ющая;

ра́дуйся, стяжа́нием доброде́телей, я́ко водо́ю живо́ю, боле́зни врачу́ющая.

Ра́дуйся, мольбы́ роди́телей, здра́вия ча́дом прося́щих, не отрева́ющая;

ра́дуйся, всем притека́ющим к тебе́ с ве́рою ми́лость от Бо́га испра́шивающая.

Ра́дуйся, преподо́бная ма́ти Елисаве́то, чудотво́рице, Бо́гом избра́нная.

Конда́к 9

Все естество́ А́нгельское удиви́ся си́ле Бо́жией, в немощне́м сосу́де же́нскаго естества́ де́йствующей. Егда́ о́чи слепорожде́нному отве́рзла еси́, пресла́вная ма́ти Елисаве́то, тогда́ просла́ви Творца́ исцеле́нный тобо́ю слепе́ц, гла́сом Варти́меовым вопия́: Аллилу́ия.

И́кос 9

Вити́йствовати не мо́жет язы́к наш высоту́ чудотворе́ний твои́х, богодухнове́нная ма́ти! Кто пове́сть, ка́ко возсия́ свет во о́чию слепорожде́ннаго, припа́дшаго к тебе́ с ве́рою и возопи́вшаго: "Поми́луй мя, ве́рная учени́це Бо́жия!"? Ты же, сострада́нием преиспо́лнена, возде́вши ру́це в моли́тве, еле́ом пома́зала еси́ зе́ницы незря́чия, и па́ки во всю седми́цу не преста́ла еси́ умоля́ющи Исто́чника вся́каго све́та, Го́спода на́шего Иису́са Христа́, дарова́ти прозре́ние слепцу́ убо́гому, ве́дущи, я́ко близ есть Госпо́дь. Сама́ же ты, о ма́ти свята́я, виде́ние светоза́рное и боже́ственное удосто́илася еси́ лицезре́ти. Та́ко и мы, сле́пи су́ще душе́ю, прозре́ти же твои́ми моли́твами жела́юще, взыва́ем ти:

Ра́дуйся, цельбоно́сная купе́ле, очеса́ незря́чая отверза́ющая;

ра́дуйся, свет Христо́в свя́тостию жития́ явля́ющая.

Ра́дуйся, прекра́сный цве́те, чудесы́ исцеле́ний благоуха́ющий;

ра́дуйся, све́тлая звездо́, путь ко спасе́нию освеща́ющая.

Ра́дуйся, та́йны Бо́жия очи́ма се́рдца позна́вшая;

ра́дуйся, соше́ствие Ду́ха Свята́го на Святы́я Да́ры созерца́вшая.

Ра́дуйся, в черто́зех небе́сных трисо́лнечным Све́том ны́не наслажда́ющаяся;

ра́дуйся, врачевство́ оче́с от ико́ны твоея́ нам ще́дро посыла́ющая.

Ра́дуйся, преподо́бная ма́ти Елисаве́то, чудотво́рице, Бо́гом избра́нная.

Конда́к 10

О спасе́нии души́ ревну́ющи, ма́ти честна́я, пред исхо́дом от вре́меннаго жития́ сего́, места́, бли́зкая се́рдцу твоему́, посети́ла еси́: Ира́клии же дости́гши, в Халкопрати́йстей це́ркви Богоро́дицы чуде́снаго явле́ния му́ченицы Глике́рии сподо́билася еси́, я́же возвести́ ти ско́рое преселе́ние во Оте́чество Небе́сное, иде́же Херуви́ми воспева́ют непреста́нно: Аллилу́ия.

И́кос 10

Стена́ тве́рдая и заступле́ние необори́мое яви́лася еси́ всем с ве́рою к тебе́ прибега́ющим: и́бо и по отше́ствии твое́м во оби́тели ве́чныя не престае́ши чудотвори́ти и явля́ти по́мощь твою́. Досто́йно и сла́вно бы́сть сие́ преставле́ние твое́, преподо́бная ма́ти, егда́ ты, пра́здник во оби́тели великому́ченика Гео́ргия све́тло соверши́вши, с моли́твою предала́ еси́ ду́шу твою́ в ру́це Госпо́дни, глаго́лющи: ны́не отпуща́еши рабу́ твою́, Влады́ко, с ми́ром: и небе́сною ле́потою просия́ пресве́тлое лице́ твое́. Мы же, блаже́нную кончи́ну твою́ воспева́юще, воспису́ем ти сицева́я:

Ра́дуйся, весть о исхо́де твое́м с ра́достию восприи́мшая;

ра́дуйся, де́во благоразу́мная, Жениха́ твоего́ бо́дрственно ожида́вшая.

Ра́дуйся, добропло́дная смоко́внице, в вертогра́ды ра́йския пресажде́нная;

ра́дуйся, со А́нгелы ны́не трисвяту́ю пе́снь воспева́ющая.

Ра́дуйся, сострада́нием к неду́жным преиспо́лненная;

ра́дуйся, хода́таице пред Влады́кою о всех прося́щих тя.

Ра́дуйся, я́ко о спасе́нии на́шем Го́спода умоля́еши;

ра́дуйся, я́ко в час исхо́да на́шего ме́сто поко́йно душа́м уготовля́еши.

Ра́дуйся, преподо́бная ма́ти Елисаве́то, чудотво́рице, Бо́гом избра́нная.

Конда́к 11

Пе́ние хвале́бное прино́сим ти, пречу́дная ма́ти Елисаве́то, я́ко и ны́не во гра́де Москве́ явля́еши чудоде́йственную си́лу твою́ неисце́льно неду́гующим, от бесо́в му́чимым и во отча́янии су́щим, да вси просла́вят Творца́ и Зижди́теля, воспева́юще: Аллилу́ия.

И́кос 11

Светоно́сную свещу́ зрим тя, свята́я Елисаве́то, с высоты́ светя́щую, и све́том чудотворе́ний просвеща́ющую ду́ши воспева́ющих ти похва́льная сицева́я:

Ра́дуйся, звездо́, в созве́здии святы́х я́сно сия́ющая;

ра́дуйся, луча́ми благода́ти мир согрева́ющая.

Ра́дуйся, многосве́тлая лампа́до Боже́ственнаго Све́та;

ра́дуйся, боже́ственный огнь любве́ в душа́х на́ших возжига́ющая.

Ра́дуйся, многопло́дная розго́, гро́зды принося́щая исцеле́ний;

ра́дуйся, во служе́нии стра́ждущим во́лю Человеколю́бца Бо́га исполня́ющая.

Ра́дуйся, наде́ждо на́ша, го́рькая рыда́ния на сле́зы умиле́ния претворя́ющая;

ра́дуйся, ра́досте на́ша, от ико́ны твоея́ целе́бную си́лу явля́ющая.

Ра́дуйся, преподо́бная ма́ти Елисаве́то, чудотво́рице, Бо́гом избра́нная.

Конда́к 12

Благода́ть чудотворе́ний от всеще́драго Бо́га прия́ла еси́, преблага́я ма́ти Елисаве́то, по досто́инству бо чудотво́рица нарече́на бы́сть, и не то́кмо в земно́м житии́, но и по кончи́не вели́чием чуде́с нас удивля́еши и сла́вити Го́спода призыва́еши: Аллилу́ия.

И́кос 12

Пою́ще Бо́га, ди́внаго во святы́х Свои́х, сла́вим тя, ма́ти всехва́льная, предстоя́ще пред о́бразом твои́м честны́м со упова́нием, я́ко не отврати́ши лица́ твоего́ от нас, но я́ко в земно́м житии́ твое́м ни еди́наго прося́щаго отри́нула еси́, та́ко и ны́не приими́ глас моле́ния на́шего, с любо́вию вопию́щих ти такова́я:

Ра́дуйся, Це́ркве Христо́вы сла́во;

ра́дуйся, зако́ны естества́ превозше́дшая.

Ра́дуйся, де́вства преди́вное соверше́ние;

ра́дуйся, преподо́бных пресла́вное украше́ние.

Ра́дуйся, и́нокинь во гра́де Москве́, я́ко и в Царегра́де пре́жде, наста́внице;

ра́дуйся, оби́тели, под покро́вом твои́м су́щей, похвало́ и ра́дование.

Ра́дуйся, неисчерпа́емый исто́чниче исцеле́ний;

ра́дуйся, поро́ков и страсте́й искорени́тельнице.

Ра́дуйся, преподо́бная ма́ти Елисаве́то, чудотво́рице, Бо́гом избра́нная.

Конда́к 13

О прехва́льная уго́днице Бо́жия, преподо́бная ма́ти Елисаве́то, чудотво́рице царегра́дская и ве́рная засту́пнице на́ша! Приими́ ма́лое моле́ние сие́, с любо́вию тебе́ приноси́мое, и всеси́льным твои́м хода́тайством вся́кое зло от нас отжени́ и к све́ту за́поведей спаси́тельных возведи́, да в стра́шный день Суда́ одесну́ю пра́веднаго Судии́ ста́вше, сподо́бимся ку́пно с тобо́ю воспе́ти ра́достно: Аллилу́ия.

Сей конда́к глаго́лется три́жды.
И па́ки чте́тся и́кос 1-й, и конда́к 1-й.

Моли́тва

О пречу́дная ма́ти на́ша, вели́кая уго́днице Бо́жия Елисаве́то! Ле́ностию и ины́ми страстьми́ побежда́емии, недосто́йни есмы́ возноси́ти моли́твы тебе́, вся тяготы́ мона́шескаго по́двига поне́сшей и души́ своея́ ра́ди возлю́бленнаго тобо́ю Христа́ не пощаде́вшей. Но ка́ко воста́нем со одра́ боле́зни без врача́, или́ уразуме́ем прему́дрость без учи́теля? Сего́ ра́ди припа́даем к тебе́, наста́внице на́шей и чудотво́рице, и мо́лим: исцели́ нас от страсте́й, отве́рзи очеса́ на́ша серде́чная, да возненави́дим грех, живу́щий в нас, и омы́вше ду́шу слеза́ми покая́ния, всем се́рдцем Спаси́теля на́шего Го́спода Иису́са Христа́ возлю́бим и Ему́, отве́ргшеся себе́, порабо́таем. Мо́лим тя и о бли́жних на́ших: боля́щих исцели́, в беда́х и обстоя́нии су́щих защити́, непло́дным жена́м ра́дость о ча́дех да́руй, ю́ных от прельще́ний ми́ра сего́ покры́й, и вся ны на спаси́тельныя стези́ напра́ви, да сподо́бимся в небе́сных оби́телех непреста́нно сла́вити Всесвяту́ю Тро́ицу во ве́ки веко́в. Ами́нь.




-->