Чин краткаго молебнаго пения о сохранении творения Божия


Текст утвержден Священным Синодом 
Русской Православной Церкви 
13 июля 2015 года
(журнал № 41)
 
 

Чин кра́ткаго моле́бнаго пе́ния
о сохране́нии творе́ния Бо́жия

Диа́кон: Благослови́, Влады́ко.

Свяще́нник: Благослове́н Бог наш всегда́, ны́не и при́сно, и во ве́ки веко́в.

Лик: Ами́нь.

Диа́кон: Сла́ва Тебе́, Бо́же наш, сла́ва Тебе́.

И мы: Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Та́же чтец:

Святы́й Бо́же, Святы́й Кре́пкий, Святы́й Бессме́ртный, поми́луй нас.

Сла́ва, и ны́не:

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, три́жды.

Сла́ва, и ны́не:

О́тче наш, И́же еси́ на Небесе́х! Да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́, и на земли́. Хлеб наш насу́щный даждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Свяще́нник: Я́ко Твое́ есть ца́рство, и си́ла, и сла́ва, Отца́ и Сы́на и Свята́го Ду́ха, ны́не и при́сно, и во ве́ки веко́в.

Чтец: Ами́нь. Го́споди, поми́луй, 12.

Сла́ва, и ны́не:

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псало́м 103

Благослови́, душе́ моя́, Го́спода. Го́споди Бо́же мой, возвели́чился еси́ зело́, во испове́дание и в велеле́поту обле́клся еси́. Одея́йся све́том, я́ко ри́зою, простира́яй не́бо, я́ко ко́жу. Покрыва́яй вода́ми превы́спренняя Своя́, полага́яй о́блаки на восхожде́ние Свое́, ходя́й на крилу́ ве́треню. Творя́й А́нгелы Своя́ ду́хи, и слуги́ Своя́ пла́мень о́гненный. Основа́яй зе́млю на тве́рди ея́, не преклони́тся в век ве́ка. Бе́здна я́ко ри́за одея́ние ея́, на гора́х ста́нут во́ды: от запреще́ния Твоего́ побе́гнут, от гла́са гро́ма Твоего́ убоя́тся. Восхо́дят го́ры, и низхо́дят поля́ в ме́сто, е́же основа́л еси́ им. Преде́л положи́л еси́, его́же не пре́йдут, ниже́ обратя́тся покры́ти зе́млю. Посыла́яй исто́чники в де́брех, посреде́ гор про́йдут во́ды. Напая́ют вся зве́ри се́льныя, ждут она́гри в жа́жду свою́. На тых пти́цы небе́сныя привита́ют, от среды́ ка́мения дадя́т глас. Напая́яй го́ры от превы́спренних Свои́х, от плода́ дел Твои́х насы́тится земля́. Прозяба́яй траву́ ското́м, и злак на слу́жбу челове́ком, извести́ хлеб от земли́. И вино́ весели́т се́рдце челове́ка, ума́стити лице́ еле́ем, и хлеб се́рдце челове́ка укрепи́т. Насы́тятся древа́ польска́я, ке́дри Лива́нстии, и́хже еси́ насади́л. Та́мо пти́цы вогнездя́тся, ероди́ево жили́ще предводи́тельствует и́ми. Го́ры высо́кия еле́нем, ка́мень прибе́жище за́яцем. Сотвори́л есть луну́ во времена́, со́лнце позна́ за́пад свой. Положи́л еси́ тьму, и бысть нощь, в не́йже про́йдут вси зве́рие дубра́внии, ски́мни рыка́ющии восхи́тити, и взыска́ти от Бо́га пи́щу себе́. Возсия́ со́лнце, и собра́шася, и в ло́жах свои́х ля́гут. Изы́дет челове́к на де́ло свое́, и на де́лание свое́ до ве́чера. Я́ко возвели́чишася дела́ Твоя́, Го́споди, вся прему́дростию сотвори́л еси́, испо́лнися земля́ тва́ри Твоея́. Сие́ мо́ре вели́кое и простра́нное: та́мо га́ди, и́хже несть числа́, живо́тная ма́лая с вели́кими. Та́мо корабли́ препла́вают, змий сей, его́же созда́л еси́ руга́тися ему́. Вся к Тебе́ ча́ют, да́ти пи́щу им во бла́го вре́мя. Да́вшу Тебе́ им, соберу́т: отве́рзшу Тебе́ ру́ку, вся́ческая испо́лнятся бла́гости. Отвра́щшу же Тебе́ лице́, возмяту́тся: оты́меши дух их, и исче́знут, и в персть свою́ возвратя́тся. По́слеши Ду́ха Твоего́, и сози́ждутся, и обнови́ши лице́ земли́. Бу́ди сла́ва Госпо́дня во ве́ки, возвесели́тся Госпо́дь о де́лех Свои́х, призира́яй на зе́млю, и творя́й ю́ трясти́ся, прикаса́яйся гора́м, и дымя́тся. Воспою́ Го́сподеви в животе́ мое́м, пою́ Бо́гу моему́, до́ндеже есмь. Да услади́тся Ему́ бесе́да моя́, аз же возвеселю́ся о Го́споде. Да исче́знут гре́шницы от земли́, и беззако́нницы, я́коже не бы́ти им. Благослови́, душе́ моя́, Го́спода.

Сла́ва, и ны́не:

Аллилу́ия, аллилу́ия, аллилу́ия, сла́ва Тебе́, Бо́же. Три́жды.

И а́бие диа́кон глаго́лет во глас 6:

Бог Госпо́дь и яви́ся нам, благослове́н Гряды́й во И́мя Госпо́дне.

Стих: Испове́дайтеся Го́сподеви, я́ко Благ, я́ко в век ми́лость Его́.

Стих: Обыше́дше, обыдо́ша мя, и И́менем Госпо́дним противля́хся им.

Стих: Не умру́, но жив бу́ду и пове́м дела́ Госпо́дня.

Стих: Ка́мень, его́же небрего́ша зи́ждущии, сей бысть во главу́ у́гла: от Го́спода бысть сей и есть ди́вен во очесе́х на́ших.

Лик: Бог Госпо́дь… во глас 6, к коему́ждо стиху́.

Та́же тропари́, глас 6:

Поми́луй нас, Го́споди, поми́луй нас; вся́каго бо отве́та недоуме́юще, сию́ Ти моли́тву, я́ко Влады́це, гре́шнии прино́сим: поми́луй нас.

Сла́ва: И́же дре́вле в Вавило́не го́рдыя язы́ки порази́вый, Го́споди, пра́веднаго Твоего́ преще́ния изба́ви ны./ Пощади́ гре́шныя лю́ди Твоя́,/ я́же стяжа́л еси́ Твое́ю Кро́вию;/ не преда́ждь нас поги́бели от дел рук на́ших,/ ино́го бо, ра́зве Тебе́, Бо́га не ве́мы,/ и воззови́ погиба́ющим:/ Аз есмь с ва́ми, и никто́же на вы.

И ны́не: Милосе́рдия две́ри отве́рзи нам, благослове́нная Богоро́дице, наде́ющиися на Тя да не поги́бнем, но да изба́вимся Тобо́ю от бед: Ты бо еси́ спасе́ние ро́да христиа́нскаго.

Диа́кон: Во́нмем. Прему́дрость. Во́нмем.

Проки́мен, глас 1: Бу́ди, Го́споди, ми́лость Твоя́ на нас, я́коже упова́хом на Тя.

Стих: Го́споди, услы́ши моли́тву мою́ и вопль мой.

Апо́стол к ри́мляном [зача́ло 98]:

Бра́тие, ве́мы бо, я́ко вся тварь с на́ми совоздыха́ет и сболе́знует да́же доны́не: не то́чию же, но и са́ми нача́ток Ду́ха иму́ще, и мы са́ми в себе́ воздыха́ем, всыновле́ния ча́юще, избавле́ния те́лу на́шему. Упова́нием бо спасо́хомся. упова́ние же ви́димое, несть упова́ние: е́же бо ви́дит кто, что и упова́ет? А́ще ли, его́же не ви́дим, наде́емся, терпе́нием ждем. Си́це же и Дух спосо́бствует нам в не́мощех на́ших: о чесо́м бо помо́лимся, я́коже подоба́ет, не ве́мы, но Сам Дух хода́тайствует о нас воздыха́нии неизглаго́ланными. Испыта́яй же сердца́ весть, что есть мудрова́ние Ду́ха, я́ко по Бо́гу припове́дует о святы́х.

Аллилу́ия, глас 4:

Бо́же, уще́дри ны и благослови́ ны.

Стих: Просвети́ лице́ Твое́ на ны, и поми́луй ны.

Диа́кон: Прему́дрость, про́сти, услы́шим свята́го Ева́нгелия.

Свяще́нник: Мир всем.

Лик: И ду́хови твоему́.

Свяще́нник: От Матфе́а свята́го Ева́нгелия чте́ние.

Лик: Сла́ва Тебе́, Го́споди, сла́ва Тебе́.

Диа́кон: Во́нмем.

Свяще́нник чтет Ева́нгелие от Матфе́я [зача́ло 100]:

Рече́ Госпо́дь Свои́м ученико́м: я́коже мо́лния исхо́дит от восто́к и явля́ется до за́пад, та́ко бу́дет прише́ствие Сы́на Челове́ческаго: иде́же бо а́ще бу́дет труп, та́мо соберу́тся орли́. А́бие же, по ско́рби дний тех, со́лнце поме́ркнет, и луна́ не даст све́та своего́, и зве́зды спаду́т с небесе́, и Си́лы Небе́сныя подви́гнутся: и тогда́ яви́тся зна́мение Сы́на Челове́ческаго на небеси́: и тогда́ воспла́чутся вся коле́на земна́я и у́зрят Сы́на Челове́ческаго гряду́ща на о́блацех небе́сных с си́лою и сла́вою мно́гою: и по́слет А́нгелы Своя́ с тру́бным гла́сом ве́лиим, и соберу́т избра́нныя Его́ от четы́рех ветр, от коне́ц небе́с до коне́ц их. От смоко́вницы же научи́теся при́тчи: егда́ уже́ ва́ия ея́ бу́дут мла́да, и ли́ствие прозя́бнет, ве́дите, я́ко близ есть жа́тва: та́ко и вы, егда́ ви́дите сия́ вся, ве́дите, я́ко близ есть, при две́рех.

Лик: Сла́ва Тебе́ Го́споди, сла́ва Тебе́.

Диа́кон глаго́лет ектению́:

Поми́луй нас, Бо́же, по вели́цей ми́лости Твое́й, мо́лим Ти ся, услы́ши и поми́луй.

Лик: Го́споди, поми́луй, три́жды.

Еще́ мо́лимся о вели́ком господи́не и отце́ на́шем Святе́йшем Патриа́рхе Кири́лле, и о господи́не на́шем высокопреосвяще́ннейшем митрополи́те (или́:архиепи́скопе, или́: преосвяще́ннейшем епи́скопе) и́мярек, и о всей во Христе́ бра́тии на́шей.

Лик: Го́споди, поми́луй, три́жды.

Еще́ мо́лимся о Богохрани́мей стране́ на́шей, власте́х и во́инстве ея́, да ти́хое и безмо́лвное житие́ поживе́м во вся́ком благоче́стии и чистоте́.

Лик: Го́споди, поми́луй, три́жды.

Сотвори́вый мир и вся, я́же в нем, Го́споди, приими́ покая́ние на́ше и во вре́мя потре́бно посли́ земли́ дождь и благорастворе́ние возду́хов, умири́ стихи́и, да грех на́ших ра́ди не му́чается и стра́ждет тварь, мо́лим Ти ся, услы́ши и ми́лостивно поми́луй.

Лик: Го́споди, поми́луй, три́жды.

Дело́м го́рдых проти́вящийся, Го́споди, дела́ рук на́ших испра́ви, да не обратя́тся на главы́ на́ша и не погубя́т ны беды́ и напа́сти, но при́зри на смире́ние на́ше и низпосли́ благода́ть и мир, мо́лим Ти ся, услы́ши и ми́лостивно поми́луй.

Лик: Го́споди, поми́луй, три́жды.

Да не стра́ждет лихои́мств и беззако́ний ра́ди на́ших творе́ние Твое́, Го́споди, но да сохрани́тся неврежде́нно от всех наве́т вра́жиих, мо́лим Ти ся, услы́ши и поми́луй.

Лик: Го́споди, поми́луй, три́жды.

Еще́ мо́лимся о е́же не помяну́ти беззако́ний и непра́вд люде́й Свои́х и отврати́ти от нас весь гнев Свой, пра́ведно на ны дви́жимый, и не погуби́ти мир сей гла́дом, жа́ждею и ины́ми беда́ми, но сохрани́ти его́, и нас пощади́ти, мо́лим Ти ся, услы́ши и поми́луй.

Лик: Го́споди, поми́луй, три́жды.

Свяще́нник возгла́с: Услы́ши ны, Бо́же, Спаси́телю наш, упова́ние всех конце́в земли́ и су́щих в мо́ри дале́че, и ми́лостив, ми́лостив бу́ди, Влады́ко, о гресе́х на́ших, и поми́луй ны. Ми́лостив бо и Человеколю́бец Бог еси́, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Лик: Ами́нь.

Диа́кон: Го́споду помо́лимся.

Лик: Го́споди, поми́луй.

Свяще́нник же чтет моли́тву сию́ о благостоя́нии ми́ра:

Благослове́н еси́, Го́споди Бо́же Вседержи́телю, сотвори́вый не́бо и зе́млю со все́ю ле́потою их, просвети́вый день све́том со́лнечным и нощь уясни́вый заря́ми о́гненными, вся́кия тва́ри Тво́рче, созда́вый от земли́ челове́ка, отпа́вшаго же и преда́вшаго Тя назда́вый па́ки Честно́ю Кро́вию Единоро́днаго Сы́на Твоего́! При́зри с Небесе́, Бо́же, и виждь, я́ко се́тует земля́, и древеса́ и бы́лие изчеза́ют, зве́рие и ско́ти, и пти́цы небе́сныя погиба́ют за нече́стие живу́щих на ней. Сего́ ра́ди в покая́нии припа́даем и вопие́м Ти, да не погуби́ши мир Твой и нас со беззако́ньми на́шими, но да́руй обраще́ние безу́мным сыно́м челове́ческим и спасе́ние им и тва́ри им покоре́нной. Благослове́н еси́, Го́споди, пото́пом омы́вый при Но́и грех челове́ческий! Да́руй нам пото́ки сле́зныя и омове́ние скверн на́ших, да обрати́мся от злых дел, хище́ний и непра́вд на́ших, во е́же храни́ти достоя́ние Твое́. Благослове́н еси́, Го́споди Бо́же Вседержи́телю, при Ло́те попали́вый ме́рзости Содо́мския и Гомо́ррския и очи́стивый Зе́млю Обетова́нную от скверн их! Да́руй исправле́ние извраще́нным и стропо́тным умо́м и сердца́м челове́ческим, да позна́ют путь Твой. Благослове́н еси́, Го́споди Бо́же Вседержи́телю, И́же прише́ствием Возлю́бленнаго Сы́на Твоего́ обнови́вый и очи́стивый всю тварь! Да́руй, да уве́руют лю́дие всем се́рдцем и просла́вят Тя, и Единоро́днаго Сы́на Твоего́, и Уте́шителя Ду́ха Свята́го, да челове́ки и стихи́ями и все́ю тва́рию сла́вится пречестно́е и великоле́пое И́мя Святы́я Тро́ицы во ве́ки веко́в.

Лик: Ами́нь.

Диа́кон: Го́споду помо́лимся.

Лик: Го́споди, поми́луй.

Свяще́нник глаго́лет и́ну моли́тву:

Го́споди Бо́же Вседержи́телю, Соде́телю и Тво́рче вся́ческих, покрыва́яй вода́ми превы́спренняя Своя́, всю зе́млю древесы́ многови́дными и живо́тными разли́чными напо́лнивый, и животворя́яй ю́, да вся тварь благодари́т Тя, Изряднохудо́жника. Ты еси́ И́же и челове́ка сотвори́вый по о́бразу и подо́бию Твоему́, и в ми́ре сем поста́вивый, во е́же возде́лывати и храни́ти его́. Не отврати́ лица́ Твоего́ и ны́не, Го́споди Человеколю́бче, зря мир Твой расхища́емь от беззако́ний и страсте́й на́ших. Я́ко се́тует земля́, древеса́ и бы́лие исчеза́ют, зве́рие и ско́ти, и пти́цы небе́сныя погиба́ют за нече́стие сыно́в челове́ческих. Мо́лимся Ти, Всемилосе́рдый Бо́же, поми́луй ны, испо́лни сердца́ на́ша све́том Твоего́ богоразу́мия и приими́ покая́ние на́ше, да возде́лываем мир Твой во бла́го душа́м и телесе́м на́шим и во сла́ву Пресвята́го И́мене Твоего́. Тебе́ бо подоба́ет вся́кая сла́ва, честь и поклоне́ние, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Лик: Ами́нь.

Диа́кон: Прему́дрость.

Свяще́нник: Пресвята́я Богоро́дице, спаси́ нас.

Лик: Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Свяще́нник: Сла́ва Тебе́, Христе́ Бо́же, упова́ние на́ше, сла́ва Тебе́.

Лик: Сла́ва Отцу́, и Сы́ну, и Свято́му Ду́ху, и ны́не и при́сно, и во ве́ки веко́в. Ами́нь. Го́споди, поми́луй, три́жды. Благослови́.

Свяще́нник отпу́ст:

Христо́с, и́стинный Бог наш, моли́твами Пречи́стыя Своея́ Ма́тере, преподо́бных и богоно́сных оте́ц на́ших и всех святы́х, поми́лует и спасе́т нас, я́ко Благ и Человеколю́бец.

Лик: Го́споди, поми́луй, три́жды.




-->