Поминовение на заупокойной ектении на Литургии и Последование благодарственного и молебного пения ко Господу Богу, певаемого в день Победы в Великой Отечественной войне


Текст опубликован на официальном сайте
Русской Православной Церкви
7 мая 2010 года
 
 

Осо́бые заупоко́йные проше́ния
в день Побе́ды над фаши́стской Герма́нией

На ектении́ и в моли́тве Бо́же духо́в:

Еще́ мо́лимся о упокое́нии душ приснопа́мятных вожде́й и во́инов за ве́ру и Оте́чество на по́ли бра́ни жизнь свою́ положи́вших, от ран и гла́да сконча́вшихся, в плене́нии и го́рьких рабо́тах неви́нно уму́ченных и убие́нных и всех Побе́ды ра́ди потруди́вшихся, и о е́же прости́тися им вся́кому прегреше́нию во́льному и нево́льному.

При возглаше́нии ве́чной па́мяти:

Во блаже́нном успе́нии ве́чный поко́й пода́ждь, Го́споди, усо́пшим рабо́м Твои́м, приснопа́мятным вожде́м и во́ином за ве́ру и Оте́чество на по́ли бра́ни жизнь свою́ положи́вшим, от ран и гла́да сконча́вшимся, в плене́нии и го́рьких рабо́тах неви́нно уму́ченным и убие́нным и всем Побе́ды ра́ди потруди́вшимся, и сотвори́ им ве́чную па́мять.

 

 

После́дование
благода́рственнаго и моле́бнаго пе́ния ко Го́споду Бо́гу, пева́емаго
в день Побе́ды в Вели́кой Оте́чественной войне́

Диа́кон: Благослови́, Влады́ко.

Иере́й возглаша́ет: Сла́ва Святе́й, и Единосу́щней, и Животворя́щей, и Неразде́льней Тро́ице, всегда́, ны́не и при́сно и во ве́ки веко́в.

Лик: Ами́нь.

Диа́кон: Ми́ром Го́споду помо́лимся: до проше́ния: О пла́вающих:

К обы́чным проше́ниям присоединя́ем осо́бая:

О е́же испра́витися моли́тве на́шей сей, я́ко кади́лу пред Спаси́телем на́шим Бо́гом, и прия́тися сей же́ртве серде́ц и усте́н, испове́дающихся Го́сподеви в день спасе́ния, услы́шавшему нас в день печа́ли, Го́споду помо́лимся.

О е́же непреобори́му и победи́тельну всегда́ над враги́ Оте́честву бы́ти, и мир и сла́ву утверди́ти в земли́ на́шей, Го́споду помо́лимся.

О е́же дарова́ти нам благода́ть от ны́не и до ве́ка ве́рою и любо́вию возвеща́ти спасе́ние и си́лу и Ца́рство Бо́га на́шего и о́бласть Христа́ Его́, пода́вшему стране́ на́шей си́лу и возда́вшему нам ра́дость спасе́ния Своего́, Го́споду помо́лимся.

О изба́витися нам:

Заступи́, спаси́, поми́луй:

Пресвяту́ю, Пречи́стую:

Возгла́с: Я́ко подоба́ет Тебе́ вся́кая сла́ва:

Посе́м, Бог Госпо́дь, и яви́ся нам: со стихи́.

Тропа́рь, глас 4:

Благода́рни су́ще, недосто́йнии раби́ Твои́, Го́споди, о Твои́х вели́ких благодея́ниих на нас бы́вших, сла́вяще Тя, хва́лим, благослови́м, благодари́м, пое́м и велича́ем Твое́ благоутро́бие, и ра́бски любо́вию вопие́м Ти: Благоде́телю, Спа́се наш, сла́ва Тебе́.

Сла́ва, глас 1:

Спаси́, Го́споди, лю́ди Твоя́ и благослови́ достоя́ние Твое́, побе́ды правосла́вным христиа́ном на сопроти́вныя да́руя и Твое́ сохраня́я Кресто́м Твои́м жи́тельство.

И ны́не, Богоро́дичен, глас 8:

Взбра́нной Воево́де победи́тельная, я́ко изба́вльшеся от злых, благода́рственная воспису́ем Ти, раби́ Твои́, Богоро́дице, но, я́ко иму́щая держа́ву непобеди́мую, от вся́ких нас бед свободи́, да зове́м Ти: ра́дуйся, Неве́сто Неневе́стная.

Диа́кон: Во́нмем.

Иере́й: Мир всем.

Чтец: И ду́хови твоему́.

Диа́кон: Прему́дрость, во́нмем.

Чтец: Проки́мен, глас 4: Госпо́дь кре́пость лю́дем Свои́м даст, Госпо́дь благослови́т лю́ди Своя́ ми́ром.

Стих: Принеси́те Го́сподеви, сы́нове Бо́жии, принеси́те Го́сподеви сла́ву и честь.

Апо́стол ко Ефесе́ем, зача́ло 233.

Бра́тие, возмога́йте о Го́споде, и в держа́ве кре́пости Его́. Облецы́теся во вся ору́жия Бо́жия, я́ко возмощи́ вам ста́ти проти́ву ко́знем диа́вольским. Я́ко несть на́ша брань к кро́ви и пло́ти, но к нача́лом и ко власте́м, и к миродержи́телем тьмы ве́ка сего́, к духово́м зло́бы поднебе́сным. Сего́ ра́ди приими́те вся ору́жия Бо́жия, да возмо́жете проти́витися в день лют, и вся соде́явше ста́ти. Ста́ните у́бо препоя́сани чресла́ ва́ша и́стиною, и обо́лкшеся в броня́ пра́вды, и обу́вше но́зе во угото́вание благовествова́ния ми́ра. Над все́ми же восприи́мше щит ве́ры, в не́мже возмо́жете вся стре́лы лука́ваго разжже́нныя угаси́ти. И шлем спасе́ния восприими́те, и меч духо́вный, и́же есть глаго́л Бо́жий.

Ева́нгелие от Матфе́я, зача́ло 98–99 (сбо́рное).

Рече́ Госпо́дь Свои́м ученико́м: услы́шати и́мате бра́ни и слы́шания бра́нем. Зри́те, не ужаса́йтеся, подоба́ет бо всем сим бы́ти, но не тогда́ есть кончи́на. Воста́нет бо язы́к на язы́к и ца́рство на ца́рство, и бу́дут гла́ди и па́губы, и тру́си по ме́стом. Вся же сия́ нача́ло боле́знем. Бу́дет бо тогда́ скорбь ве́лия, якова́ же не была́ от нача́ла ми́ра досе́ле, ниже́ и́мать бы́ти. И а́ще не бы́ша прекрати́лися дни́е о́ны, не бы у́бо спасла́ся вся́ка плоть. Избра́нных же ра́ди прекратя́тся дни́е о́ны.

По Ева́нгелии ектения́: Рцем вси:

По Еще́ мо́лимся о богохрани́мей стране́ на́шей: присоединя́ем проше́ния осо́бая:

Еще́ мо́лимся, о е́же прия́ти Го́споду Спаси́телю на́шему испове́дание и благодаре́ние нас, недосто́йных рабо́в Свои́х, я́ко не по беззако́нием на́шим сотвори́л есть нам, ниже́ по грехо́м на́шим возда́л есть нам, но и в годи́ну искуше́ния, прише́дшаго на Оте́чество на́ше и на всю вселе́нную, изба́вил ны есть, и внегда́, обыше́дше, обыдо́ша нас врази́ на́ши, яви́л есть нам спасе́ние Свое́.

Еще́ мо́лимся о вожде́х и во́инех на́ших, на по́ли бра́ни жизнь свою́ положи́вших, от ран и гла́да сконча́вшихся, в плене́нии и го́рьких рабо́тах неви́нно уму́ченных и убие́нных, и всех Побе́ды ра́ди потруди́вшихся, я́ко да даст им Царь сла́вы в день пра́веднаго Своего́ воздая́ния жизнь ве́чную и венцы́ нетле́ния, нас же всех в ве́ре и единомы́слии утверди́т.

Еще́ мо́лимся Тебе́ Го́споду, Бо́гу на́шему, о е́же призре́ти на ско́рби, беды́, страда́ния, сле́зы и стена́ния люде́й Свои́х, и Ми́лостиву бы́ти и отврати́ти весь гнев Свой, пра́ведно дви́жимый на ны, и поми́ловати ны.

Возгла́с: Услы́ши ны, Бо́же, Спаси́телю наш:

Хор: Ами́нь.

Диа́кон: Го́споду помо́лимся.

Хор: Го́споди, поми́луй.

Иере́й же со все́ю це́рковию со вся́ким внима́нием и умиле́нием глаго́лет моли́тву сию велегла́сно:

Бо́же Вели́кий и Непостижи́мый, спаса́яй погиба́ющия, животворя́й ме́ртвыя,/ вся творя́й по во́ли Твое́й, и ди́вным Твои́м про́мыслом управля́яй вся́ческая!/ Приклони́ у́хо Твое́ с высоты́ святы́я Твоея́ и приими́ от нас, смире́нных и недосто́йных рабо́в Твои́х,/ се́рдцем и усты́ возноси́мая Тебе́ благода́рственная сия́ моле́ния, испове́дания и славосло́вия. Я́ко не по беззако́нием на́шим сотвори́л еси́ нам, Го́споди, ниже́ по грехо́м на́шим возда́л еси́ нам./ Ты глаго́лал еси́ дре́вле сыново́м Изра́илевым, я́ко, а́ще не послу́шают гла́са Твоего́ храни́ти и твори́ти вся за́поведи Твоя́,/ наведе́ши на них язы́к безсту́ден лице́м, и́же сокруши́т их во граде́х их, до́ндеже разоря́тся сте́ны их./ И мы ве́дехом, я́ко испо́лнися глаго́л сей стра́шный на наро́де на́шем./ Но Ты, Го́споди Бо́же, Ще́дрый и Ми́лостивый, Долготерпели́вый и И́стинный/ и пра́вду храня́й и творя́й ми́лость, ми́лостию ве́лиею поми́ловал еси́/ и, посети́в жезло́м непра́вды на́ша, уще́дрил еси́ нас побе́дою на сопоста́ты./ Те́мже утверди́ся се́рдце на́ше в Го́споде на́шем,/ вознесе́ся рог наш в Бо́зе на́шем, возвесели́хомся о спасе́нии Твое́м./ Благодари́м Тя за избавле́ние Оте́чества от врага́ лю́таго./ Даждь нам, Го́споди, па́мять сего́ сла́внаго Твоего́ посеще́ния/ тве́рдо и непреста́нно име́ти в себе́,/ е́же всегда́ благодари́ти и славосло́вити:/ сла́ва Тебе́, Бо́гу, Благода́телю на́шему, во ве́ки веко́в.

Лик: Ами́нь.

Диа́кон: Прему́дрость.

Лик: Честне́йшую Херуви́м:

Свяще́нник: Сла́ва Тебе́, Христе́ Бо́же, упова́ние на́ше, сла́ва Тебе́.

Сла́ва, и ны́не: Го́споди, поми́луй (три́жды). Благослови́.

И отпу́ст:

Воскресы́й из ме́ртвых, Христо́с, И́стинный Бог наш, моли́твами Пречи́стыя Своея́ Ма́тере, святы́х сла́вных и всехва́льных апо́стол, свята́го великому́ченика и Победоно́сца Гео́ргия, всех святы́х, в земли́ Ру́сстей просия́вших, и всех святы́х, поми́лует и спасе́т нас, я́ко Благ и Человеколю́бец.

Та́же:

Во блаже́нном успе́нии ве́чный поко́й пода́ждь, Го́споди, усо́пшим рабо́м Твои́м, приснопа́мятным вожде́м и во́ином за ве́ру и Оте́чество на по́ли бра́ни жизнь свою́ положи́вшим, от ран и гла́да сконча́вшимся, в плене́нии и го́рьких рабо́тах неви́нно уму́ченным и убие́нным и всем Побе́ды ра́ди потруди́вшимся, и сотвори́ им ве́чную па́мять.

По сих же Многоле́тия и Христо́с воскре́се: (три́жды)

 

Опубликовано на официальном сайте
Русской Православной Церкви 07.05.2010
(http://www.patriarchia.ru/db/text/1154886.html).




-->