Служба общая мученику Российскому XX века единому


Текст утвержден Священным Синодом
Русской Православной Церкви
26 декабря 2006 года
(журнал № 149)
 
 

Слу́жба о́бщая
му́ченику Росси́йскому ХХ ве́ка еди́ному

 

В Е́ Ч Е Р

На Го́споди, воззва́х: стихи́ры, глас 2.

Подо́бен: Ки́ими похва́льными венцы́:

Ки́ими похва́льными венцы́/ увязе́м страда́льца Христо́ва и́мярек,/ Це́ркве Росси́йския ве́рнаго сы́на?/ И́же устраше́ний безбо́жных не убоя́вся,/ на беззако́нное суди́ще взы́де/ и, я́ко дре́вний му́ченик, о уби́йцех моля́шеся, вопия́:// Го́споди, прости́ им, не ве́дят бо, что творя́т.

Ки́ими досто́йными пе́сньми/ воспое́м новому́ченика Христо́ва и́мярек?/ И́же, за́поведи Госпо́дни испо́лнив,/ у́зы темни́чныя, труды́ го́рькия и изгна́ния претерпе́/ и да́же до сме́рти Христу́ ве́рным пребы́сть./ Ны́не же мо́лится дарова́ти нам// мир и ве́лию ми́лость.

Ки́ими пе́сненными добро́тами/ просла́вим но́ваго му́ченика Росси́йскаго и́мярек?/ И́же, во страда́нии кре́пость яви́в,/ си́лою Христо́вою безбо́жныя одоле́/ и сме́ртию свое́ю воскресе́ние Христо́во пропове́да./ Ны́не же у престо́ла Бо́жия с ли́ки новому́ченик предстои́т// и мо́лится спасти́ся душа́м на́шим.

Слава, глас 8:

А́ще и уби́ша те́ло твое́ многострада́льное, му́чениче и́мярек,/ и кровь твою́ непови́нную пролия́ша нечести́вии,/ оба́че душа́ твоя́, я́ко пти́ца, изба́вися от се́ти ловя́щих./ Сего́ ра́ди, свя́те, обре́л еси́ поко́й в черто́зех Небе́сных,/ иде́же прославля́еши Отца́, и Сы́на, и Свята́го Ду́ха,// Тро́ицу Единосу́щную и Неразде́льную.

И ны́не, Богоро́дичен: Царь Небе́сный:

Вход. Проки́мен дне. И чте́ния 3 му́ченическая.

На стихо́вне стихи́ры, глас 4.

Подо́бен: Я́ко до́бля:

Я́ко благи́й раб и ве́рный,/ собира́я сокро́вище не ги́блющее,/ но в живо́т ве́чный пребыва́ющее,/ тала́нт, вруче́нный ти Го́сподем,/ муче́нием преумно́жил еси́,/ страда́льче сла́вный и́мярек,/ и в ра́дость Го́спода твоего́ вшел еси́./ Те́мже моли́ усе́рдно// спасти́ся душа́м на́шим.

Стих: Пра́ведник, я́ко фи́никс, процвете́т,// я́ко кедр, и́же в Лива́не, умно́жится.

В нощи́ безбо́жных гоне́ний/ на Це́рковь Ру́сскую/ прии́де испыта́ти ду́шу твою́ Госпо́дь/ и блаже́ннаго тя раба́/ бдя́ща вои́стинну обре́те,/ всече́стне му́чениче и́мярек./ И ктому́ нарече́ тя дру́га и́скренняго,/ и сонасле́дника Ца́рствия Небе́снаго,// и моли́твенника те́пла о душа́х на́ших.

Стих: Насажде́ни в дому́ Госпо́дни,// во дво́рех Бо́га на́шего процвету́т.

Исполня́ются на му́ченицех словеса́ Христо́ва:/ несть раб бо́лий Го́спода своего́,/ Мене́ изгна́ша и вас иждену́т./ Ты у́бо, му́чениче до́блий и́мярек,/ любо́вь соверше́нну стяжа́в,/ ду́шу твою́ за Христа́ положи́л еси́/ и блаже́нство изгна́нных пра́вды ра́ди дости́гл еси́./ Те́мже, ны́не Престо́лу Бо́жию предстоя́,// моли́ спасти́ся душа́м на́шим.

Сла́ва, глас 5:

Прииди́те, мучениколю́бцы вси,/ благоче́стно воспои́м Христо́ва страстоте́рпца сла́внаго и́мярек,/ тече́ние до́бре соверши́вша/ и ве́ру правосла́вную сохра́ньша./ Сей бо, безбо́жных ко́зни сокруши́в/ и кро́вию свое́ю зе́млю Ру́сскую освяти́в,/ от ми́ра сего́ вре́меннаго преста́вися к ве́чному/ и от Вседержи́тельныя десни́цы прия́т вене́ц пра́вды./ Те́мже сла́дости ра́йскаго блаже́нства наслажда́ется/ и Престо́лу Бо́жию предстои́т,// прославля́я Тро́ицу Единосу́щную и Неразде́льную.

И ны́не, Богоро́дичен: Храм и Дверь еси́:

Тропа́рь, глас 4:

Му́ченик Твой, Го́споди, и́мярек,/ во страда́нии свое́м вене́ц прия́т нетле́нный от Тебе́, Бо́га на́шего,/ име́яй бо кре́пость Твою́,/ мучи́телей низложи́,/ сокруши́ и де́монов немощны́я де́рзости./ Того́ моли́твами// спаси́ ду́ши на́ша.

 

Н А   У́ Т Р Е Н И

По 1-м стихосло́вии седа́лен, глас 4:

Непоколеби́мь во испове́дании ве́ры пребы́л еси́, страда́льче и́мярек,/ егда́ мучи́телие понужда́ху тя отрещи́ся Христа́./ Те́мже смерть Того́ ра́ди му́жественне претерпе́л еси́/ и моли́твенник те́плый о душа́х на́ших яви́лся еси́.

Сла́ва, и ны́не, Богоро́дичен:

О Всепе́тая Богоро́дице Влады́чице,/ му́чеников испове́дание и ве́нче,/ А́нгелы сла́вимая и челове́ки воспева́емая,/ и всего́ ми́ра возжеле́нная Помо́щнице,/ изба́ви Це́рковь Ру́сскую вся́каго обстоя́ния, Еди́на Благослове́нная.

По 2-м стихосло́вии седа́лен, глас 4:

Страда́ния лю́тая до́блественне претерпева́я, му́чениче и́мярек,/ ева́нгельския за́поведи соблю́л еси́/ и, я́ко до́брый и ве́рный раб, в ра́дость Го́спода твоего́ вшел еси́,/ И́же воздаде́ ти по пра́вде твое́й/ и яви́ лю́дем росси́йским спобо́рника необори́ма.

Сла́ва, и ны́не, Богоро́дичен:

Стена́ необори́мая ве́рным и му́чеником похвала́ Ты еси́, Богоро́дице Де́во,/ к Тебе́ бо прибега́юще, невреди́ми пребыва́ем и усе́рдную Моли́твенницу и́мамы./ Тем, благодаря́ще, вопие́м Ти:/ ра́дуйся, Благода́тная, Госпо́дь с Тобо́ю.

Велича́ние:

Велича́ем тя,/ страстоте́рпче святы́й и́мярек,/ и чтим честна́я страда́ния твоя́,/ я́же за Христа́// претерпе́л еси́.

Псало́м избра́нный:

1-й лик: Бог нам Прибе́жище и Си́ла, Помо́щник в ско́рбех, обре́тших ны зело́.

2-й лик: Мене́ жда́ша гре́шницы погуби́ти мя, свиде́ния Твоя́ разуме́х.

1-й лик: Глаго́лах о свиде́ниих Твои́х пред цари́ и не стыдя́хся.

2-й лик: Вси язы́цы обыдо́ша мя, и и́менем Госпо́дним противля́хся им.

1-й лик: Аз на ра́ны гото́в: и бых я́звен весь день.

2-й лик: Тебе́ ра́ди умерщвля́емся: вмени́хомся я́ко о́вцы заколе́ния.

1-й лик: Госпо́дь утвержде́ние мое́: и Изба́витель мой: и упова́ю на Него́.

2-й лик: Кре́пость моя́ и пе́ние мое́ Госпо́дь, и бысть мне во спасе́ние.

1-й лик: Ты, Го́споди, сохрани́ши ны и соблюде́ши ны от ро́да сего́ и во век.

2-й лик: Искуси́л ны еси́, Бо́же, разже́гл ны еси́, я́коже разжиза́ется сребро́.

По полиеле́и седа́лен, глас 4:

Ско́рби, сле́зы и страда́ния за Христа́ от безбо́жных бра́тий претерпе́в на земли́, му́чениче и́мярек,/ ны́не жи́зни ве́чныя ра́достне у Престо́ла Бо́жия наслажда́ешися/ и мо́лишися непреста́нно о душа́х на́ших.

Сла́ва, и ны́не, Богоро́дичен:

Непоколеби́мое утвержде́ние ве́ры/ и при́сное прибе́жище душ на́ших,/ Богоро́дицу пе́сньми велича́ем, ве́рнии:/ ра́дуйся, Правосла́вия огражде́ние,/ ра́дуйся, земли́ Ру́сския покро́ве,/ ра́дуйся, Неве́сто неневе́стная.

Степе́нна, 1-й антифо́н 4-го гла́са. Проки́мен, глас 4: Го́споди, Тебе́ ра́ди// умерщвля́еми есмы́ весь день. Стих: Вмени́хомся я́ко о́вцы заколе́ния. Вся́кое дыха́ние: Ева́нгелие от Луки́, зача́ло 63 (12, 2–7).

По 50-м псалме́ стихи́ра, глас 6:

К Бо́гу Вы́шнему Живо́му/ воззва́л еси́, му́чениче добропобе́дне и́мярек:/ поми́луй мя, Го́споди,/ я́ко врази́ нечести́вии попира́ют мя./ Той же изба́ви ду́шу твою́ от сме́рти,/ о́чи от слез и но́зе от поползнове́ния,/ и со святы́ми земли́ Ру́сския// во све́те живы́х просла́ви тя.

Кано́н, глас 5:

Песнь 1

Ирмо́с: Коня́ и вса́дника в мо́ре Чермно́е,/ сокруша́яй бра́ни, мы́шцею высо́кою/ Христо́с истрясе́,/ Изра́иля же спасе́,// побе́дную песнь пою́ща.

Кро́вными муче́нии вшел еси́ в Небе́сная селе́ния, и́мярек сла́вне,/ я́коже дре́вле Изра́иль в зе́млю обетова́нную, фарао́ном гони́мь./ Ны́не же, Престо́лу Святы́я Тро́ицы предстоя́,/ моли́ о чту́щих святу́ю па́мять твою́.

Ру́сския Це́ркве сы́не ве́рный и́мярек, и страда́льче изря́дный,/ ты сквозе́ огнь и во́ду муче́ний побе́дно проше́л еси́./ Те́мже и Госпо́дь Мучениколю́бец угото́ва ти поко́й ве́чный.

Егда́ прии́де на зе́млю Ру́сскую годи́на безбо́жия,/ кре́пость во испове́дании ве́ры и кро́тость во страда́нии яви́л еси́, до́блий му́чениче,/ моля́ся о убива́ющих тя.

Богоро́дичен: Разреши́ся кля́тва, печа́ль преста́,/ Благослове́нная бо и Благода́тная Богоро́дица ве́рным Ра́дость породи́,/ Христа́, Спасе́ние ми́ра.

Песнь 3

Ирмо́с: Водрузи́вый на ничесо́мже зе́млю повеле́нием Твои́м,/ и пове́сивый неодержи́мо тяготе́ющую,/ на недви́жимем, Христе́, ка́мени за́поведей Твои́х,/ Це́рковь Твою́ утверди́,// еди́не Бла́же и Человеколю́бче.

Пра́ведных ду́ши в руце́ Бо́жией и не прико́снется их му́ка,/ се́ю наде́ждею укрепля́емь, и́мярек крепкоду́шне,/ теле́сная страда́ния му́жественне терпе́л еси́.

Оде́явся си́лою кре́стною,/ противоста́л еси́, и́мярек, пролива́ющим кровь непови́нную/ и не убоя́лся еси́ и́стину возвеща́ти враго́м Це́ркве Христо́вы.

Смяте́ся земля́ Ру́сская, поне́же беззако́нию предаде́ся,/ ты же, му́чениче и́мярек пресла́вне,/ зако́н Бо́жий небоя́зненно исполня́я,/ непоколеби́мь Ца́рствия ра́ди Бо́жия яви́лся еси́.

Богоро́дичен: Ты, Ма́ти Бо́жия, неизрече́нно родила́ еси́ Сы́на,/ от Отца́ пре́жде век рожде́нна./ Те́мже Тя Богоро́дицу правосла́вно велича́ем.

Седа́лен, глас 3:

Глад, гоне́ния ве́лия, лише́ния разли́чная,/ ско́рби мно́гия, тесноту́ и во у́зах го́рькия рабо́ты/ му́жественне претерпе́л еси́ от ненави́дящих Го́спода, страда́льче и́мярек,/ и ничто́же возмо́же разлучи́ти тя от любве́ Христо́вы,/ Его́же ра́ди и смерть му́ченическую прия́л еси́./ Мы же тя, я́ко те́плаго предста́теля к Нему́ стяжа́вше,/ достодо́лжно прославля́ем.

Сла́ва, и ны́не, Богоро́дичен:

Ки́йждо иде́же спаса́ется, та́мо пра́ведно и притека́ет:/ и ко́е ино́е прибе́жище, я́ко Ты, Богоро́дице,/ оте́чества на́шего Усе́рдная Засту́пница?

Песнь 4

Ирмо́с: Боже́ственное Твое́ разуме́в истоща́ние/ прозорли́во Авваку́м, Христе́, со тре́петом вопия́ше Тебе́:/ во спасе́ние люде́й Твои́х// спасти́ пома́занныя Твоя́ прише́л еси́.

Егда́ смяте́ся земля́ Ру́сская,/ ты, страда́льче и́мярек, я́ко добр во́ин Христо́в,/ терпе́нием поте́кл еси́ на предлежа́щий по́двиг/ и, багряни́цею крове́й оде́явся,/ му́ченически пострада́л еси́.

Поне́же в ма́лом ве́рен раб яви́лся еси́, сла́вне,/ Госпо́дь вя́щший дар ти вручи́,/ е́же испове́дати пред мучи́тели Бо́га и́стиннаго,/ Его́же ра́ди и пострада́л еси́.

Попуще́нием Бо́жиим бысть гоне́ние на Це́рковь Бо́жию в стране́ Росси́йстей,/ ты же, му́чениче, я́ко до́блий во́ин Христо́в,/ непоколеби́мь в за́поведех Госпо́дних пребы́л еси́.

Богоро́дичен: Зачала́ еси́ нетле́нно во чре́ве, Пречи́стая,/ и без боле́зни Бо́га пло́тию родила́ еси́,/ и по рождестве́ Де́ва пребыла́ еси́.

Песнь 5

Ирмо́с: Одея́йся све́том, я́ко ри́зою,/ к Тебе́ у́тренюю/ и Тебе́ зову́:/ ду́шу мою́ просвети́ омраче́нную, Христе́,// я́ко еди́н Благоутро́бен.

Я́ко сын дне, на Не́бо душе́ю твое́ю возше́л еси́, страда́льче и́мярек,/ и зе́млю Ру́сскую кро́вию твое́ю ороси́л еси́./ Сего́ ра́ди Не́бо и земля́ ны́не тя совоку́пно велича́ют.

Ни гоне́ние лю́тое, ни у́зы темни́чныя,/ ни рабо́ты го́рькия, ни скорбь, ни теснота́/ возмого́ша тя отлучи́ти от любве́ Бо́жия, му́чениче,/ оба́че, Христо́м укрепля́емь, вся препобеди́л еси́.

Ве́рен быв Це́ркви Бо́жией,/ и в чистоте́ соблюда́я еди́нство ея́,/ чужда́лся еси́ разделе́ний, блаже́нне,/ и при́сно моли́лся еси́ о первоиера́рсе Росси́йстем.

Богоро́дичен: Покро́в, заступле́ние и утеше́ние в напа́стех и злых обстоя́ниих Ты еси́, Богоро́дице./ Сего́ ра́ди благода́рственно Тя велича́ем.

Песнь 6

Ирмо́с: Неистовству́ющееся бу́рею душетле́нною,/ Влады́ко Христе́, страсте́й мо́ре укроти́,/ и от тли возведи́ мя,// я́ко Благоутро́бен.

Егда́ бу́ря гоне́ний одержа́ше кора́бль Це́ркве Ру́сския,/ ты, му́чениче, небоя́зненне и неисхо́дне в нем пребы́л еси́,/ име́я Ко́рмчаго Сама́го Христа́.

Егда́ лю́дие безбо́жнии воста́ша на Це́рковь Ру́сскую,/ ты, терпеливоду́шне, не убоя́вся лише́ний,/ ве́рен да́же до сме́рти Христу́ пребы́л еси́.

Егда́ оклевета́н бысть бли́жними твои́ми, свя́те,/ в се́рдце зла ника́коже на о́ныя име́я, моли́лся еси́:/ Го́споди, не вмени́ им греха́ сего́. Богоро́дичен: Де́ва Пречи́стая, Христа́ Младе́нца ро́ждши,/ во Еги́пте изгна́ние И́родово претерпе́:/ те́мже, страда́ния испыта́вши,/ мо́жет и нам, бе́дствующим, помощи́.

Конда́к, глас 5:

Ве́рный сын земли́ Ру́сския яви́лся еси́,/ новому́чениче и́мярек,/ Христа́, Со́лнце Пра́вды, возвеща́я/ и безбо́жия тьму отгоня́я./ Ны́не же, сро́дники твоя́ в Правосла́вней ве́ре утвержда́я,// моли́ся о душа́х на́ших.

И́кос:

Что тя нарече́м, до́блий му́чениче и́мярек?/ Изгна́нника, я́ко до́ма и сро́дников лиши́лся еси́?/ У́зника, я́ко темни́чныя у́зы претерпе́л еси́?/ Дру́га Бо́жия, я́ко бли́жним во страда́ниих помога́л еси́?/ Испове́дника, я́ко ве́ру тве́рдую яви́л еси́?/ Страда́льца, я́ко му́ки испыта́л еси́?/ Ны́не же, престо́лу Бо́жию предстоя́,/ сро́дники твоя́ в Правосла́вней ве́ре утвержда́й/ и моли́ся о душа́х на́ших.

Песнь 7

Ирмо́с: Превозноси́мый отце́в Госпо́дь,/ пла́мень угаси́, о́троки ороси́,/ согла́сно пою́щия:// Бо́же, благослове́н еси́.

Егда́ земля́ Ру́сская поколеба́ся грех ра́ди на́ших,/ яви́л еси́ тве́рдое испове́дание ве́ры, и́мярек прему́дре,/ безбо́жия пла́мень угаша́я.

О́бщаго безу́мия и умо́в шата́ния чужд яви́лся еси́, му́чениче и́мярек,/ оба́че любо́вию ко Христу́ распала́емь,/ твои́м страда́нием обличи́л еси́ безбо́жие.

Зло́бу и руга́тельства мучи́телей претерпева́я, и́мярек,/ утверди́л еси́ стопы́ твоя́, я́ко на ка́мени,/ име́я в се́рдце глаго́л Христо́в:/ бу́ди ве́рен до сме́рти, и дам ти вене́ц живота́.

Богоро́дичен: Еди́ну у́бо Ипоста́сь во двою́ естеству́, Богома́ти, родила́ еси́, Бо́га и Челове́ка./ Те́мже, ве́рнии, с любо́вию возопии́м:/ благослове́на Ты в жена́х еси́, Всенепоро́чная Влады́чице.

Песнь 8

Ирмо́с: Тебе́, Вседе́телю,/ в пещи́ о́троцы всеми́рный лик спле́тше, поя́ху:/ дела́ вся́кая, Го́спода по́йте,// и превозноси́те во вся ве́ки.

Его́же о́троцы в пещи́ воспе́ша,/ Той и тя, страда́льче, в пла́мени гоне́ний сохрани́, взыва́юща:/ благослове́н еси́, Бо́же оте́ц на́ших.

Слага́я в се́рдце твое́м глаго́л Христо́в,/ е́же не боя́тися убива́ющих те́ло, души́ же не могу́щих уби́ти,/ му́жественне на по́двиг страда́ния поте́кл еси́, свя́те, взыва́я:/ благослове́н еси́, Бо́же оте́ц на́ших.

А́ще и преда́шася поруга́нию и оскверне́нию святы́ни земли́ Ру́сския,/ оба́че не изнемо́гл еси́ душе́ю/ и тверд в ве́ре пребы́л еси́, и́мярек, взыва́я:/ благослове́н еси́, Бо́же оте́ц на́ших.

Богоро́дичен: Зря́щи Сы́на Твоего́, Пречи́стая, в земли́ на́шей поруга́ема безбо́жники,/ Це́рковь Ру́сскую не оста́вила еси́ хода́тайством Твои́м, досто́йно взыва́ющу:/ ра́дуйся, Благода́тная, Госпо́дь с Тобо́ю.

Песнь 9

Ирмо́с: Иса́ие, лику́й,/ Де́ва име́ во чре́ве,/ и роди́ Сы́на Емману́ила,/ Бо́га же и Челове́ка,/ Восто́к И́мя Ему́:// Его́же велича́юще, Де́ву ублажа́ем.

Сла́ву еди́ному Бо́гу возда́л еси́,/ И́же сла́вящия Его́ прославля́ет,/ те́мже ро́ди ру́сстии тя ублажа́ют,/ му́чениче и́мярек приснопа́мятне.

Страда́ния твоя́ и смерть му́ченическая, блаже́нне,/ свиде́тельствоваху любо́вь твою́ ко Христу́, Сы́ну Бо́жию./ Те́мже, ны́не жи́зни ве́чныя наслажда́яся,/ моли́ся о нас, любо́вию тя прославля́ющих.

Побе́дным венце́м увенча́ тя Христо́с Бог,/ Его́же возлюби́л еси́ и Его́же ра́ди кровь твою́ пролия́л еси́./ Ему́же ны́не приле́жно моли́ся,/ Правосла́вию в земли́ на́шей утверди́тися/ и душа́м на́шим спасе́ние улучи́ти.

Ору́жием благоволе́ния венча́ тя Госпо́дь, му́чениче всече́стне и́мярек,/ и даде́ тебе́ си́лу на безбо́жныя гони́тели./ Те́мже и ны́не, я́ко добр во́ин,/ спобо́рствуй Це́ркви Ру́сстей на враги́ мно́гия.

Богоро́дичен: О Цари́це Многопе́тая!/ О Влады́чице Держа́вная!/ Не оста́ви нас ми́лостию Твое́ю,/ с новому́ченики Росси́йскими Тя велича́ющих.

Свети́лен:

Тьмы безбо́жия отврати́вся,/ страда́ния за Христа́ претерпе́л еси́, достохва́льне и́мярек,/ ны́не же во све́тлостех святы́х с новому́ченики ликовству́я,/ моли́ спасти́ и просвети́ти ча́да Це́ркве Ру́сския.

Сла́ва, и ны́не, Богоро́дичен:

Отжени́ тьму грехо́вную душ на́ших/ и к све́ту за́поведей Христо́вых напра́ви, Путеводи́тельнице и́стинная,/ да, покая́нием очи́стившеся, гла́сы благода́рственными Тя велича́ем.

На хвали́тех стихи́ры, глас 5.

Подо́бен: Ра́дуйся:

Ра́дуйся, новому́чениче прехва́льне, и́мярек,/ и́стинный сы́не Святы́я Це́ркве,/ во всеору́жие Христо́во облече́нный/ и ве́ры ра́ди до кро́ве подвиза́выйся./ Ты, гони́тели благословля́я, глаго́лал еси́:/ а́ще и те́ло мое́ убие́те,/ ду́шу же не возмо́жете разлучи́ти от любве́ Бо́жия,/ я́же о Христе́ Иису́се.// Его́же моли́ спасти́ и просвети́ти ду́ши на́ша.

Ра́дуйся, страда́льче изря́дный и́мярек,/ и́стинный Христо́в подо́бниче,/ Крест Госпо́день на ра́мо прие́мый,/ и в годи́ну гоне́ний лю́тых на Це́рковь Ру́сскую пострада́вый./ Ты бо, поноше́ний не убоя́вся,/ лише́ния, у́зы и рабо́ты го́рькия нивочто́же вмени́л еси́/ и смерть, я́ко приобре́тение жи́зни ве́чныя со Христо́м,/ досто́йно и ра́достно сре́тил еси́.// Его́же моли́ спасти́ и просвети́ти ду́ши на́ша.

Ра́дуйся, му́чениче достохва́льне и́мярек,/ кровьми́ страда́льческими обагре́нный,/ при́сный о нас предста́телю/ и те́плый к Бо́гу моли́твенниче./ Ты, ны́не престо́лу Бо́жию предстоя́,/ с ли́ки новому́ченик и испове́дник Росси́йских/ о земне́м Оте́честве твое́м хода́тайствуеши/ и Христу́ песнь благода́рственную прино́сиши.// Его́же моли́ спасти́ и просвети́ти ду́ши на́ша.

Сла́ва, глас 8:

Сла́вою и че́стию нетле́нною/ венча́ Госпо́дь многострада́льную твою́ главу́,/ я́ко посреде́ безбо́жных гоне́ний лю́тых/ дал еси́ сла́ву хвале́ Его́,/ му́чениче добропобе́дне и́мярек,// Це́ркве Ру́сския удобре́ние.

И ны́не, Богоро́дичен, глас то́йже.

Подо́бен: О, пресла́внаго чудесе́:

Сра́дуются с на́ми у́мная вся Чинонача́лия,/ лик духо́вный совоку́пльше,/ ви́дяще Цари́цу и Влады́чицу всех,/ многоиме́нне ве́рными сла́виму,/ ра́дуются же и ду́си пра́ведных,/ су́щии зри́телие виде́ния,/ на возду́се Свои́ ру́це моле́бно простира́ющу,/ прося́щу умире́ния миру// и спасе́ния душа́м на́шим.

Славосло́вие вели́кое и отпу́ст.

 

Н А   Л И Т У Р Г И́ И

Блаже́нна от кано́на, пе́снь 3-я и 6-я.

Проки́мен, глас 4: А́ще пойду́ посреде́ се́ни сме́ртныя, не убою́ся зла,// я́ко Ты со мно́ю еси́. Стих: Госпо́дь пасе́т мя и ничто́же мя лиши́т.

Апо́стол к Тимофе́ю, зача́ло 292 (2 Тим. 2, 1–10).

Аллилу́ия, глас 6: Живы́й в по́мощи Вы́шняго, в кро́ве Бо́га Небе́снаго водвори́тся. Стих: Рече́т Го́сподеви: Засту́пник мой еси́ и Прибе́жище мое́, Бог мой и упова́ю на Него́.

Ева́нгелие от Иоа́нна, зача́ло 52 (Ин. 15, 17–27).

Прича́стен: В па́мять ве́чную бу́дет пра́ведник:

Моли́тва

О пресла́вный и добропобе́дный му́чениче Христо́в и́мярек, и́стинный во́ине святы́я Це́ркве, сро́дником твои́м земны́м похвало́ и украше́ние! Ты, не убоя́вся безбо́жнаго гоне́ния, ве́ру Правосла́вную да́же до кро́ве испове́дал еси́, страда́нии же твои́ми о́браз ве́рным подая́, врата́ми пра́вды в Ца́рство Небе́сное вше́л еси́. Те́мже мо́лим тя, я́коже не́когда моли́твою твое́ю ко Го́споду си́лу претерпе́ти страда́ния стяжа́л еси́, та́ко и ны́не моли́ся, да пода́ст нам Госпо́дь си́лу за́поведи Его́ животво́рныя соблюда́ти, и да изба́вит нас от уз греха́ и безбо́жия, Оте́чество же на́ше да сохрани́т в Правосла́вии до сконча́ния ве́ка. Ами́нь.




-->