Служба преподобному Льву Оптинскому


Текст утвержден Священным Синодом
Русской Православной Церкви
27 декабря 2016 года
(журнал № 127)
 
 

Ме́сяца октября́ в 11-й день
Преподо́бнаго Льва О́птинскаго

 

НА ВЕЛИ́ЦЕЙ ВЕЧЕ́РНИ

На Го́споди, воззва́х: стихи́ры, глас 8.

Подо́бен: Что вы нарече́м:

Что тя нарече́м, о́тче Льве?/ А́нгела ли? Я́ко во пло́ти безпло́тным поревнова́л еси́./ Серафи́ма ли? Я́ко непреста́нными бде́ньми Христа́ просла́вил еси́./ Херуви́ма ли? Я́ко на тебе́ опочи́ Дух Святы́й?/ Архистрати́га ли собо́ра О́птинских отце́в?/ Я́ко низложи́л еси́ бесо́в шата́ния/ и воево́да всеиску́сен яви́лся еси́ Царя́ Христа́,/ Его́же моли́ спасти́ся душа́м на́шим.

Что тя нарече́м, о́тче Льве?/ Пусты́нных ли Боже́ственное украше́ние,/ или́ по́стников сла́вное удобре́ние,/ преподо́бных досто́йную похвалу́,/ или́ мона́шествующих ди́вное весе́лие?/ Ты бо ума́стил еси́ сердца́ ве́рных еле́ем Ду́ха/ и наста́вил еси́ нас на стези́ спаси́тельныя./ Моли́ Христа́ Бо́га спасти́ся душа́м на́шим.

Преподо́бне о́тче Льве,/ па́стырю до́брый и стра́же неусы́пный,/ в простоте́ и незло́бии пребыва́я,/ мона́хов мно́жество упа́сл еси́/ и, пу́ты пре́лести растерза́в,/ мы́сленныя во́лки отгна́л еси́./ Те́мже и ублажи́ тя Небе́сный Па́стырь Христо́с,/ Его́же моли́ спасти́ся душа́м на́шим.

Преподо́бне о́тче Льве,/ сосу́де Бо́жия прему́дрости,/ ре́ки бо наставле́ний и поуче́ний пото́ки/ от се́рдца твоего́ источи́л еси́/ и жа́ждущия ми́лости Небе́сныя напои́л еси́./ Те́мже и мы, к тебе́ усе́рдно прибега́юще, те́пле вопие́м:/ сердца́ на́ша изсо́хшая/ благода́тию Христо́вою напита́й.

Сла́ва, глас 6:

Днесь благода́ть Свята́го Ду́ха нас собра́,/ пе́сньми свяще́нными просла́вити/ собо́р отце́в преподо́бных О́птинских,/ и́же ве́рнии служи́телие Святы́я Тро́ицы яви́шася./ Сего́ ра́ди, ве́рнии, к Бо́гу с любо́вию возопии́м:/ святы́й Бо́же, святы́й Кре́пкий,/ святы́й Безсме́ртный, поми́луй нас.

И ны́не, Богоро́дичен: Кто Тебе́ не ублажи́т:

Вход. Проки́мен дне. И чте́ния преподо́бническая.

На лити́и стихи́ры хра́ма.

На стихо́вне стихи́ры собо́ра ста́рцев О́птинских, глас 5.

Подо́бен: Ра́дуйся:

Ра́дуйтеся, отцы́ достоблаже́ннии,/ Ду́ха Свята́го сосу́ди избра́ннии,/ мона́хов утвержде́ние и свяще́нников благоле́пие,/ благоче́стия столпи́ непоколеби́мии./ Вы бо, дар разсужде́ния в по́двизе стяжа́вше,/ тьму пре́лести при́сно отгоня́ете,/ и приходя́щия к вам с ве́рою и упова́нием/ на спасе́ния стези́ наставля́ете./ Моли́те спасти́ся душа́м на́шим.

Стих: Честна́ пред Го́сподем/ смерть преподо́бных Его́.

Ра́дуйтеся, ве́ры стра́жи неусы́пнии,/ служи́телие Госпо́дни изря́днии,/ мона́хом наста́вницы и А́нгелом собесе́дницы,/ во бра́нех духо́вных челове́ком побо́рницы./ Вы бо моли́твою непреста́нною/ ми́ру при́сно свет подава́ете,/ и притека́ющия к вам с любо́вию/ душетле́нных страсте́й избавля́ете./ Моли́те спасти́ся душа́м на́шим.

Стих: Восхва́лятся преподо́бнии во сла́ве/ и возра́дуются на ло́жах свои́х.

Ра́дуйтеся, свети́льницы многосве́тлии,/ вра́чеве безме́зднии,/ неду́гующим отра́до и скорбя́щим утеше́ние,/ обурева́емым приста́нище немяте́жное./ Вы бо, и́менем Христо́вым вся́ку я́зю исцели́вше,/ боля́щим здра́вие душ и теле́с подава́ете,/ и моля́щихся к вам усе́рдно/ ве́рою и наде́ждою исполня́ете./ Моли́те спасти́ся душа́м на́шим.

Сла́ва, преподо́бнаго, глас 6:

Наста́вниче ди́вный, о́тче Льве,/ первонача́льниче ста́рцев О́птинских,/ учи́телю ве́ры и благоче́стия,/ духо́вными да́ры обогати́вся,/ всем подае́ши потре́бная:/ скорбя́щим утеше́ние,/ изнемога́ющим от страсте́й исцеле́ние,/ неду́жным врачева́ние,/ гре́шником вразумле́ние./ Сего́ ра́ди просла́вим Христа́ Бо́га на́шего,/ дарова́вшаго нам уго́дника ди́внаго/ и моли́твенника о душа́х на́ших.

И ны́не, Богоро́дичен, глас то́йже.

Тропа́рь собо́ру ста́рцев О́птинских, глас 6:

Правосла́вныя ве́ры свети́льницы,/ мона́шества неколеби́мии столпи́,/ земли́ Росси́йския уте́шителие,/ преподо́бнии ста́рцы О́птинстии,/ любо́вь Христо́ву стяжа́вшии/ и ду́ши своя́ за ча́да полага́вшии,/ моли́теся ко Го́споду,/ да утверди́т земно́е оте́чество на́ше/ в правосла́вии и благоче́стии/ и спасе́т ду́ши на́ша.

Тропа́рь преподо́бному, глас 3:

По́стническими труды́ украси́вся,/ со ученики́ преподо́бнаго Паи́сия подвиза́лся еси́,/ от ни́хже ста́рчества благода́ть прии́м,/ сие́ во оби́тели О́птинстей насади́л еси́./ Те́мже, богоблаже́нне о́тче Льве,/ я́ко име́яй дерзнове́ние ко Го́споду,/ моли́ от страсте́й нас изба́вити/ и спасти́ ду́ши на́ша.

 

НА У́ТРЕНИ

По 1-м стихосло́вии седа́лен собо́ру ста́рцев О́птинских, глас 4:

Прииди́те, ве́рнии, в пе́снех духо́вных преподо́бных отце́в почти́м:/ ти́и бо, во сла́ве Ца́рствия Небе́снаго пребыва́юще,/ за ны мо́лят Всеми́лостиваго Бо́га,/ да поста́вит нас одесну́ю Себе́/ в день сла́внаго и стра́шнаго прише́ствия Своего́.

Сла́ва, седа́лен преподо́бнаго, глас то́йже:

Плотски́я стра́сти уздо́ю воздержа́ния укроти́в,/ ра́зум духо́вный пребога́тно стяжа́л еси́, Льве присносла́вне,/ его́же моли́ и нам получи́ти у Христа́ Бо́га,/ да насле́дники Ца́рствия Его́ яви́мся.

И ны́не, Богоро́дичен, глас то́йже:

Бу́рею напа́стей и треволне́ний грехо́вных потопля́емь/ и лука́выми по́мыслы в бе́здну отча́яния влеко́мь,/ усе́рдно вопию́ Ти:/ Влады́чице Пречи́стая,/ спаси́ мя, раба́ Твоего́.

По 2-м стихосло́вии седа́лен собо́ру ста́рцев О́птинских, глас 1.

Днесь Це́ркве Ру́сския торжество́ и оте́чества на́шего весе́лие,/ се бо оби́тель О́птинская моща́ми преподо́бных, я́ко зла́том нетле́нным, красу́ется/ и па́мятию святы́х свои́х благоуха́ет./ Те́мже приступи́те к ним всяк во́зраст и вся́ко сосло́вие, в ра́дости вопию́ще:/ сла́ва Просла́вльшему вас,/ сла́ва Да́вшему вам благода́ть,/ сла́ва Подаю́щему ва́ми всем исцеле́ния.

Сла́ва, седа́лен преподо́бнаго, глас 4:

Я́ко ди́вная прозябе́ния виногра́да Боже́ственнаго/ возрасти́ Христо́с ча́да твоя́, преподо́бных Мака́рия и Амвро́сия,/ и́мже наста́вник яви́лся еси́, Льве прему́дре./ Ны́не же с ни́ми во Ца́рствии Небе́снем пребыва́еши/ и прославля́еши Тро́ицу Единосу́щную и Неразде́льную.

И ны́не, Богоро́дичен, глас то́йже:

Я́ко Храм и Престо́л Царе́в, Пречи́стая,/ се́рдце мое́, страстьми́ безме́стными оскверни́вшееся, очи́сти,/ и, целому́дрием украси́вши, де́лы благи́ми обогати́, Богоблагода́тная.

Велича́ние:

Ублажа́ем тя,/ преподо́бне о́тче Льве,/ и чтим святу́ю па́мять твою́,/ наста́вниче мона́хов/ и собесе́дниче А́нгелов.

Псало́м избра́нный преподо́бным.

По полиеле́и седа́лен собо́ру ста́рцев О́птинских, глас 6:

Боже́ственный полк всечестны́х отце́в/ пе́сненными венцы́ украси́м, боголю́бцы;/ ти́и бо, де́монов по́лчища победи́вше,/ ве́ру правосла́вную в челове́цех утвержда́ют./ Их предста́тельством, Го́споди, приими́ моле́ния на́ша/ и да́руй нам ве́лию ми́лость.

Сла́ва, седа́лен преподо́бнаго, глас то́йже:

Моли́твами твои́ми укрепля́еми, Льве досточу́дне,/ дерза́ем к Бо́гу взыва́ти:/ пода́ждь нам, Го́споди, сокруше́ние серде́чное и чистоту́ помысло́в,/ па́мять сме́ртную и кончи́ну непосты́дную,/ да, изба́вльшеся зло́бы духо́в поднебе́сных,/ безбе́дне про́йдем мыта́рства и Ца́рствия Небе́снаго дости́гнем.

И ны́не, Богоро́дичен, глас то́йже:

Тя, Ма́ти Де́во Чи́стая, Предста́тельницу тве́рду ве́мы/ и Богороди́тельницу испове́дуем и́стинно,/ Бо́га бо Сло́ва неизрече́нно родила́ еси́./ Сего́ ра́ди Тя вси́ досто́йно пе́сньми велича́ем.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Ева́нгелие от Матфе́я, зача́ло 43.

По 50-м псалме́ стихи́ра собо́ру ста́рцев О́птинских, глас 6:

И́же на земли́ А́нгели/ и на небеси́ челове́цы Бо́жии,/ ми́ра благо́е украше́ние/ и оте́чества на́шего утвержде́ние,/ мона́хов и преподо́бных похвалу́,/ собо́р преподо́бных отце́в О́птинских почти́м:/ насажде́ни бо в дому́ Госпо́дни/ и процве́тше пра́ведно,/ мно́гия заблу́дшия на путь спасе́ния наста́виша/ в преподо́бии и пра́вде.

Кано́н собо́ру ста́рцев О́птинских, глас 8.

И преподо́бному кано́н, глас 2,

его́же краегране́сие: Ра́дуйся, Льве, ста́рчества О́птинскаго глави́зно.

Песнь 1

Ирмо́с: Во глубине́ постла́ иногда́/ фараони́тское всево́инство преоруже́нная си́ла,/ вопло́щшееся же Сло́во всезло́бный грех потреби́ло есть,/ препросла́вленный Госпо́дь,/ сла́вно бо просла́вися.

Припе́в: Преподо́бне о́тче наш Льве, моли́ Бо́га о нас.

Ра́зум даждь нам, Всеси́льне Го́споди,/ досто́йно воспе́ти уго́дника Твоего́,/ Льва прему́драго, ста́рца О́птинскаго,/ чистоты́ и милосе́рдия ева́нгельскаго испо́лненнаго/ и ду́хом прему́дрости све́тло укра́шеннаго.

А́нгельски на земли́ пожи́в, преподо́бне,/ и, служе́ние ста́рческое, я́ко крест, благопослу́шне от Го́спода прии́м,/ му́дрый наста́вник мно́гим и́ноком и миря́ном яви́лся еси́.

Ду́хом Бо́жиим наставля́емь,/ та́йну челове́ческаго се́рдца проразумева́л еси́,/ смиренному́дрый уго́дниче о́тче Льве,/ те́мже и мно́гия лю́ди к Небе́сному Ца́рствию приве́л еси́.

Богоро́дичен: Упова́ние на́ше и похвало́, Де́во Чи́стая,/ Христа́ Спа́са моли́,/ оставле́ние прегреше́ний нам пода́ти,/ ве́рою и любо́вию Тя почита́ющим.

Песнь 3

Ирмо́с: Процвела́ есть пусты́ня, я́ко крин, Го́споди,/ язы́ческая неплодя́щая це́рковь,/ прише́ствием Твои́м,/ в не́йже утверди́ся мое́ се́рдце.

И́стину ева́нгельскую возлюби́в и ку́плю жите́йскую оста́вив,/ к мона́шескому житию́ устреми́лся еси́, преподо́бне,/ нищету́ духо́вную стяжа́в и му́жественне греху́ противоста́в,/ горды́ню злоко́зненнаго врага́ посрами́л еси́.

Свою́ во́лю нивочто́же вменя́я, о́тче преподо́бне,/ пустыннолю́бцу Фео́дору после́довал еси́/ и, сла́дость послуша́ния и поко́й безмо́лвия вкуси́в,/ страсте́й треволне́ние, богоблаже́нне, укроти́л еси́.

Я́ко сын послуша́ния и учени́к добронра́вный, богому́дре Льве,/ преда́ние оте́ческое насле́довал еси́,/ его́же преподо́бный Паи́сий, я́ко боже́ственныя кла́сы собра́.

Богоро́дичен: Ли́цы А́нгельстии пою́т Тя, Богора́дованная Влады́чице,/ Херуви́ми же и Серафи́ми досто́йно славосло́вят,/ не пре́зри и хвалы́ земноро́дных, воспева́ющих Тя.

Седа́лен, глас 4:

Я́ко страж Бо́жий, вои́стину яви́лся еси́, о́тче Льве,/ ста́до твое́ неусы́пно и бо́дренне сохраня́я,/ и ны́не огради́ нас моли́твами твои́ми,/ ве́рою и любо́вию па́мять твою́ соверша́ющих.

Сла́ва, и ны́не, Богоро́дичен:

Я́ко Боже́ственный Мир, Спа́са Христа́, поро́ждши, Де́во Чи́стая,/ мир ми́рови и спасе́ние всем подала́ еси́,/ те́мже и жизнь на́шу умири́ и ду́ши спаси́, я́ко Блага́я.

Песнь 4

Ирмо́с: Огне́м очи́щся та́йнаго зре́ния,/ поя́ проро́к челове́ков новоде́йство,/ возглаша́ет глас, Ду́хом пле́щущ,/ воплоще́ние неизрече́нна Сло́ва,/ И́мже си́льных держа́вы сотро́шася.

Всем приходя́щим к тебе́ наста́вник му́дрый яви́лся еси́, о́тче Льве,/ и просла́вися житие́ твое́,/ умертви́в бо мудрова́ния плотска́я,/ глуби́ны ве́дения, широты́ любве́ и высоты́ смире́ния дости́гл еси́.

Егда́ к Бо́гу любо́вию возгоре́лся еси́ и усе́рдно Тому́ послужи́ти восхоте́л еси́,/ тогда́, я́ко зе́млю и пе́пел себе́ вменя́я,/ в пусты́ню безмо́лвия удали́лся еси́, о́тче преподо́бне.

Свети́льник све́тел в пусты́ни яви́вся,/ мрак бесо́вский дале́че прогна́л еси́,/ моли́тву же непреста́нную в се́рдце, я́ко меч в руце́, име́я,/ де́монов зло́бу посрами́л еси́.

Богоро́дичен: Тя Предста́тельницу тве́рду ве́мы/ и Богороди́тельницу и́стинную испове́дуем,/ я́ко Бо́га Сло́ва неизрече́нно родила́ еси́, Мари́е Де́во,/ те́мже спаса́й Тя призыва́ющия.

Песнь 5

Ирмо́с: Хода́тай Бо́гу и челове́ком был еси́, Христе́ Бо́же:/ Тобо́ю бо, Влады́ко, к Светонача́льнику Отцу́ Твоему́,/ от но́щи неве́дения,/ приведе́ние и́мамы.

А́нгельскаго жития́ взыску́я,/ на стезю́ и́ночества невозвра́тным по́мыслом ступи́л еси́/ и, му́дрость отце́в преподо́бных стяжа́в,/ наста́вник и уте́шитель мно́гим яви́лся еси́, богоблаже́нне.

Ра́достно днесь сла́вит оби́тель Валаа́мская по́стническия труды́ твоя́, о́тче Льве,/ зде бо и́ноческия по́двиги со преподо́бным Фео́дором подъя́л еси́,/ и ны́не с ним на Небеси́ ку́пно ра́дуешися.

Чистоту́ се́рдца и ум све́тел стяжа́л еси́, о́тче,/ де́лы благи́ми и чудесы́, я́ко свети́льник многосве́тлый, сия́я,/ и пре́лести тьму богодарова́нным ти разсужде́нием изобличи́л еси́.

Ели́цы ку́пли ра́ди духо́вныя к тебе́ прихожда́ху,/ зла́том смиренному́дрия обогаща́хуся,/ те́мже и на́шу нищету́ уще́дри, о́тче Льве,/ ева́нгельских доброде́телей вели́кое сокро́вище стяжа́вый.

Богоро́дичен: Све́тлый О́блаче, Со́лнце ми́ра, Го́спода Иису́са, носи́вши,/ покры́й мир от собла́знов,/ и зе́ницы оче́с духо́вных просвети́,/ во е́же сла́ву Твою́ мы́сленно зре́ти/ и любо́вию пе́ти Тя, Всеблаже́нная.

Песнь 6

Ирмо́с: Во глубине́ грехо́вней содержи́мь есмь, Спа́се,/ и в пучи́не жите́йстей обурева́емь:/ но я́коже Ио́ну от зве́ря,/ и мене́ от страсте́й возведи́, и спаси́ мя.

Те́сным путе́м ше́ствуя,/ житие́ богоуго́дне испра́вил еси́, преподо́бне,/ в О́птину же пу́стынь всели́вся,/ духо́вный вертогра́д устро́ил еси́.

Ве́лиих искуше́ний пучи́ну преплы́в,/ би́сер у́мныя моли́твы, я́ко добр купе́ц, обре́л еси́/ и пу́стынь О́птинскую, я́ко духо́вную сокро́вищницу,/ зла́том оте́ческаго преда́ния обогати́л еси́, о́тче Льве.

Адама́нт тверд в терпе́нии искуше́ний де́монских, на тя воздвиза́емых, яви́лся еси́, преподо́бне,/ те́мже боле́зни и труды́, ско́рби и гоне́ния,/ я́ко И́ов, кро́тко претерпе́л еси́, на Бо́га упова́я.

Оте́ческою любо́вию в боле́знех и ско́рбех су́щих покрыва́л еси́/ и му́чимых от духо́в нечи́стых исцеля́л еси́/ си́лою на тебе́ почи́вшаго Всесвята́го Ду́ха.

Послушли́в и рачи́телен, я́ко пчела́ боже́ственная, быв,/ некта́р духо́вный собра́л еси́, богому́дре Льве,/ и́мже ча́да церко́вная и мона́шествующих собо́ры препита́л еси́.

Богоро́дичен: Тве́рду ве́ру даждь ми, Влады́чице,/ я́ко мно́гими прило́ги смяте́ся се́рдце мое́,/ ве́тром бесо́вских искуше́ний обурева́емо,/ но упра́ви ше́ствие мое́, Богоневе́сто,/ Ты бо при́стань оти́шная рабо́м Твои́м.

Конда́к преподо́бному, глас 6:

Те́сным путе́м в житии́ твое́м ше́ствуя,/ на высоту́ доброде́телей возше́л еси́/ и, благода́ть па́стырства от Бо́га прии́м,/ слове́сныя о́вцы до́бре упа́сл еси́/ и ста́рчеству тве́рдое основа́ние/ во оби́тели О́птинстей положи́л еси́./ Те́мже ны́не, преподо́бне о́тче Льве,/ предстоя́ Пресвяте́й Тро́ице,/ моли́ спасти́ся благоче́стно тя почита́ющим.

И́кос:

И́стиннаго смире́ния и послуша́ния де́латель быв,/ дар благода́ти Бо́жия стяжа́л еси́/ и, жезл ста́рчества от Благода́теля вся́ческих прии́м,/ Христо́во ста́до слове́сных ове́ц на па́житех благоче́стия упа́сл еси́/ и мона́шествующих до́бре наста́вил еси́./ Те́мже по блаже́ннем преставле́нии твое́м,/ Престо́лу Святы́я Тро́ицы во сла́ве ны́не предстоя́,/ моли́ спасти́ся благоче́стно тя почита́ющим.

Песнь 7

Ирмо́с: О́бразу злато́му на по́ле Деи́ре служи́му,/ трие́ Твои́ о́троцы небрего́ша безбо́жнаго веле́ния:/ посреде́ же огня́ вве́ржени, ороша́еми поя́ху:/ благослове́н еси́, Бо́же оте́ц на́ших.

Иску́с подъя́л еси́, богому́дре Льве, жития́ по́стническаго/ и взыску́ющим о́наго и́стинный путево́ждь яви́лся еси́,/ наставля́я их взыва́ти:/ благослове́н еси́, Бо́же оте́ц на́ших.

Неду́зи врачу́ются и де́мони отбега́ют моли́твами твои́ми, о́тче Льве,/ те́мже мно́зии с ве́рою к ра́це моще́й твои́х притека́ют и благода́рне вопию́т:/ благослове́н еси́, Бо́же оте́ц на́ших.

Собо́р О́птинский тобо́ю хва́лится, преподо́бне,/ ты бо, я́ко ка́мень непоколеби́м во искуше́ниих пребыва́я,/ на Ка́мени ве́ры утвержда́тися науча́л еси́, взыва́я:/ благослове́н еси́, Бо́же оте́ц на́ших.

К тебе́, преподо́бне, притека́ют ве́рнии,/ я́ко любве́ Христо́вы испо́лнен быв,/ оте́ц сиро́т и вдова́м засту́пник,/ ни́щим пита́тель и наста́вник заблу́ждшим яви́лся еси́, пою́щим:/ благослове́н еси́, Бо́же оте́ц на́ших.

А́ще и мно́гия ско́рби терпе́л еси́,/ оба́че не оста́вил еси́ прибега́ющих к тебе́, глаго́ля:/ а́ще и в изгна́ние пойду́, или́ во огнь, аз бу́ду то́йже, взыва́яй:/ благослове́н еси́, Бо́же оте́ц на́ших.

Богоро́дичен: Госпоже́ и Цари́це А́нгелов,/ ца́рствующи при́сно на Небесе́х,/ гра́ды и ве́си земли́ Ру́сския покрыва́й, Богороди́тельнице,/ и рог правосла́вных возвы́си, вопию́щих:/ благослове́нна еси́, Де́во Пренепоро́чная.

Песнь 8

Ирмо́с: В купине́ Моисе́ю Де́вы чу́до,/ на Сина́йстей горе́, прообрази́вшаго иногда́,/ по́йте, благослови́те,/ и превозноси́те во вся веки.

О́птинский скит, я́коже ра́йский сад, возде́лал еси́,/ в не́мже ученики́ твоя́ взрасти́л еси́,/ и́же благода́тне процвето́ша/ и зе́млю Ру́сскую арома́ты моли́твенными облагоуха́ша.

Гоне́ния благоду́шне претерпе́л еси́,/ я́же лука́вый за́вистию воздви́же на тя оглаго́ланием от челове́к,/ за оби́дящих и претя́щих ти кро́тко моли́лся еси́, о́тче Льве преподо́бне,/ в незло́бии Христу́ подража́я.

Лесть обличи́л еси́, богому́дре,/ и, пре́лести тьму потреби́в, ду́ши от пле́на бесо́вскаго изба́вил еси́,/ те́мже и исцеле́ния пода́ждь к ра́це моще́й твои́х притека́ющим/ и превознося́щим Христа́ во вся ве́ки.

Богоро́дичен: Ада́мово воззва́ние и Е́вино избавле́ние, Мари́е Де́во,/ потщи́ся спасти́ ве́рныя лю́ди Твоя́,/ пою́щия и превознося́щия Тя во вся ве́ки.

Песнь 9

Ирмо́с: Безнача́льна Роди́теля Сын, Бог и Госпо́дь,/ вопло́щся от Де́вы нам яви́ся,/ омраче́нная просвети́ти, собра́ти расточе́нная./ Тем Всепе́тую Богоро́дицу велича́ем.

В зе́млю кро́тких всели́лся еси́, незло́бив сы́й,/ и, доброде́тельми преукра́шен, с Вы́шними лику́еши,/ те́мже спаса́й нас предста́тельством твои́м, о́тче богохва́льне.

Источа́ет благово́ния, я́ко крин, ра́ка честны́х моще́й твои́х,/ вразумля́ющи ве́рныя/ благоуха́ние ра́йскаго селе́ния взыска́ти,/ о́тче Льве достосла́вне.

Заре́ю Ду́ха облиста́емь,/ в пусты́ни О́птинстей све́тло просия́л еси́, о́тче преподо́бне,/ те́мже и доны́не сия́еши/ во тьме грехо́вней пребыва́ющим.

Небе́сная дарова́ния прии́м,/ прозрева́л еси́ бу́дущая, я́ко настоя́щая,/ те́мже, мно́гия в ве́ре утверди́в,/ ко спасе́нию приве́л еси́./ Моли́, преподо́бне, с про́чими отцы́/ в ми́ре соблюсти́ оби́тель на́шу,/ пе́сньми собо́р ста́рцев О́птинских ны́не прославля́ющих.

Богоро́дичен: Оте́чество на́ше заступи́, Влады́чице,/ и по́мощь пода́й стра́ждущим,/ си́рыя приими́ под кров Твой честны́й/ и ду́ши озло́бленныя умири́, Богоблагода́тная./ Ты бо еси́ спасе́ние ве́рою Тя велича́ющих.

Свети́лен:

Боже́ственным Све́том просвеще́н,/ све́том доброде́телей све́тло просия́л еси́, о́тче Льве, / и на све́щнице о́птинстей поста́влен,/ ны́не просвеща́еши всех ве́рно к тебе́ прибега́ющих.

Сла́ва, и ны́не, Богоро́дичен:

Моли́твами Пречи́стыя Ма́тере Твоея́/ и всех проро́ков, и му́чеников,/ и свяще́нных учени́к, Сло́ве Бо́жий,/ пода́ждь нам мир и очище́ние прегреше́ний.

На хвали́тех стихи́ры преподо́бному, глас 8.

Подо́бен: O, пресла́внаго чудесе́:

О, пресла́внаго чудесе́!/ Преподо́бный Лев О́птинский,/ блаже́ннаго Фео́дора учени́к неле́ностен,/ и до́брый рачи́тель послуша́ния/ храм че́стен Святы́я Тро́ицы показа́ся/ и му́дрый наста́вник ве́рным яви́ся./ Сего́ ра́ди лечьбы́ благода́тныя предлага́ет/ и бра́шны духо́вными оби́льно всех насыща́ет/ с ве́рою к нему́ притека́ющих.

О, пресла́внаго чудесе́!/ О, Боже́ственнаго произволе́ния!/ Я́ко дарова́ нам Госпо́дь наста́вника нело́жнаго,/ о́птинскаго ста́рчества основа́ние,/ преподо́бнаго Льва и прему́драго/ и моли́твы у́мныя де́лателя неусы́пнаго./ Сей бо ско́рый помо́щник и засту́пник усе́рдный/ и па́стырь до́брый на ни́ве Христо́вой яви́ся/ с ве́рою к нему́ притека́ющим.

О, пресла́внаго чудесе́!/ Я́ко сосу́д Ду́ха Свята́го испо́лненный,/ Лев богому́дрый ублажа́ется/ и на́ми благогове́йне прославля́ется,/ и́же прост и незло́бив сый,/ мно́гия лю́ди на путь спасе́ния наста́ви./ Ны́не же, собо́р о́птинских преподо́бных украша́я,/ Бо́жию Престо́лу предстои́т/ и мо́лится о душа́х на́ших.

Сла́ва, глас то́йже:

О́тче Льве приснопа́мятне,/ ты дар врачева́ния свои́ми боле́зньми стяжа́в,/ здра́вие приходя́щим к тебе́ подае́ши,/ и я́коже дре́вле чад свои́х, возлюби́в, наста́вил еси́,/ врачу́я боле́зни и труды́ облегча́я,/ си́це и нас не забу́ди посеща́ти/ и моли́ся Христу́ Бо́гу о душа́х на́ших.

И ны́не, Богоро́дичен, глас то́йже.

 

НА ЛИТУРГИ́И
Слу́жба преподо́бническая.